नागपूर : कोरोनाच्या वाढत्या प्रभावामुळे दहशतीत असलेल्या ४५ वर्षांवरील नागरिकांनी आज शहरातील ८६ लसीकरण केंद्रांवर लस घेण्यासाठी गर्दी केली. लस घेतल्यानंतर समाधानाने अनेकांचे चेहरे फुलल्याचे दिसून आले. 

हेही वाचा - नागरिकांनो, कोरोना फोबियाच्या विळख्यात अडकू नका; कोरोना हा सामान्य आजारासारखा आजार

केंद्र सरकारने आजपासून सरसकट ४५ वर्षांवरील सर्वांनाच लस देण्याचे आदेश काढले होते. त्यानुसार महापालिकेने शहरातील सर्वच लसीकरण केंद्रांवर उपाययोजना केल्या होत्या. ४५ वर्षांवरील नागरिकांनी आज पहिल्याच दिवशी लस घेण्यासाठी गर्दी केली. शहरामध्ये ४६ खासगी व ४० शासकीय रुग्णालयांमध्ये लसीकरण केंद्र आहेत. ५० वर्षीय अ‌ॅड. सूर्यकांत गजभिये यांनी लसीकरणाचा लाभ मिळाल्याबद्दल आनंद व्यक्त केला. लसीकरण घेतल्यानंतर कुठलाही त्रास होत नसून लस पूर्णत: सुरक्षित असल्याचे त्यांनी सांगितले. स्व. प्रभाकरराव दटके महाल रोग निदान केन्द्र येथे सकाळी ९ वाजेपासून रात्री १० वाजेपर्यंत दोन पाळीमध्ये लसीकरण करण्यात येत आहे. तसेच हंसापुरी आयुर्वेदीक दवाखान्यात देखील लसीकरणासाठी नागरिकांमध्ये उत्साह दिसून आला. याठिकाणी सर्व स्तरातील नागरिकांचा लसीकरणाला चांगला प्रतिसाद मिळत आहे, अशी माहिती झोनल वैद्यकीय अधिकारी डॉ. ख्वाजा मोईउद्दीन व प्रभारी वैद्यकीय अधिकारी डॉ. सीता कडू यांनी दिली. 

हेही वाचा - कुंभकर्णाच्या पुढ्यातच रावणाचे दहन, देशातील सर्वात...

२८ खासगी लसीकरण केंद्रांना मंजुरी - 
केंद्र सरकारने शहरातील आणखी २८ लसीकरण केंद्रांना मंजुरी दिली आहे. त्यामुळे आता लसीकरण केंद्रांत भर पडणार आहे. शहरातील खासगी रुग्णालयांनी लसीकरणाची सुविधा उपलब्ध करून देण्याची मागणी महापालिकेकडे केली होती. 
 
२२ हजारांवर नागरिकांचे लसीकरण - 
शहरातील ८६ लसीकरण केंद्रावर आज पहिला व दुसरा डोज घेणाऱ्या एकूण २२ हजार ६३ नागरिकांनी लस घेतली. यात पहिला डोज घेणाऱ्यांची संख्या १० हजार ८३५ असून दुसरा डोज घेणारे ११ हजार २२८ जण आहे. विशेष म्हणजे ४५ वर्षांवरील ६ हजार ३३१ नागरिकांनी लस घेतली.