नागपूर : मार्च महिन्यापासून १०४ दिवसांत ३९ वेळा पेट्रोल तर ३६ वेळा डिझेलच्या दरात वाढ झाली आहे. रामटेकचे खासदार कृपाल तुमाने यांनी लोकसभेत विचारलेल्या प्रश्नातून ही बाब समोर आली आहे. यामुळे महागाईत वाढ झाली आहे. सध्या नागपूर जिल्ह्यात पेट्रोल १०७ रुपये लीटर झाले आहे. ते ११० रुपये लीटरपर्यंत जाण्याची शक्यता वर्तविली जात आहे. (Petrol-Diesel-Consistent-increase-in-price-Crude-oil-prices- stabilize-MP-Krupal-Tumane-nad86)

पेट्रोल व डिझेलच्या किमतीत सातत्याने वाढ होत असल्याने वाहतूक खर्च वाढला आहे. त्याचा परिणाम वस्तूंच्या किमतीवर दिसू लागला आहे. महागाई वाढल्याने त्याची झळ सर्वसामान्यांना बसत असल्याने बजेट चांगलेच विस्कळीत झाले आहे. सार्वजनिक क्षेत्रातील तेल विक्री करणाऱ्या कंपन्या (ओएमसीज) पेट्रोल व डिझेलचे मूल्य निर्धारण करतात असे केंद्र सरकारचे म्हणणे आहे. १६ जून २०१७ पासून दररोज डॉलर व रुपयाच्या किमतीनुसार पेट्रोल, डिझेलचे दर ठरविले जात आहे.

क्रुड ऑईलच्या किमती स्थिर

तीन वर्षांचा विचार केल्यास क्रुड ऑईलच्या किमतीत फारशी वाढ झालेली नाही. एप्रिल २०१८ मध्ये क्रूड ऑईल ६९.३२ डॉलर प्रति बॅरल होते. एप्रिल २०१९ मध्ये ६६.९५ डॉलर, एप्रिल २०२०मध्ये १९.९० डॉलर पर्यंत निच्चांक गाठला होता. जून २०२१मध्ये क्रुड ऑईलची सरासरी किंमत ७४.३४ डॉलर होती. इंधनाच्या किमतीमुळे महागाईत वाढ झाली आहे. पेट्रोल, डिझेल व एलपीजीमुळे त्यात अनुक्रमे १.६०, ३.१० व ०.६४ टक्के इतकी भर पडली आहे याकडे तुमाने यांनी लक्ष वेधले.

(Petrol-Diesel-Consistent-increase-in-price-Crude-oil-prices- stabilize-MP-Krupal-Tumane-nad86)