नागपूर : मध्यवर्ती कारागृहात कैद्यांची झडती सुरू असताना संधी साधून फरार झालेल्या कैद्याला सोमवारी पहाटेच्या सुमारास अटक करण्यात आली. तो गिट्टीखदान परिसरात लपून बसला होता. सायमन ॲन्थोनी फ्रान्सीस (वय १८, रा. ८५ प्लॉट एरिया, दुर्गा माता मंदिराजवळ, अजनी) असे अटक केलेल्या कैद्याचे नाव आहे.

पोलिसांनी दिलेल्या माहितीनुसार, सायमन फ्रान्सीस याला अजनी पोलिसांनी दुचाकी चोरीच्या आरोपात २७ ऑगस्टला अटक केली होती. त्याला न्यायालयाने दोन दिवस पोलिस कोठडी सुनावली होती. पीसीआर संपल्यानंतर अजनी पोलिसांनी त्याला पुन्हा न्यायालयात हजर केले होते. न्यायालायाने सायमनला न्यायालयीन कोठडीत ठेवण्याचे आदेश दिले होते. त्यामुळे अजनी पोलिसांचे पथक सायमनला घेऊन रविवारी सायंकाळी सहा वाजता मध्यवर्ती कारागृहात गेले होते.

अधिक माहितीसाठी - शेतातील मजूर करीत होता लाख विनवणी अन् अचानक निर्दयी दरोडेखोरांनी...

कैद्यांना कारागृहात जमा करीत असताना पोलिसांनी सायमनच्या हाताला दोर बांधला आणि पोलिस बिनधास्तपणे गप्पा करीत उभे होते. पोलिस गप्पांमध्ये गुंतल्याचे पाहून सायमनने पोलिस कर्मचाऱ्यांना गुंगारा देऊन पळून दोरासह पळून गेला. कैदी पळून गेल्याचे लक्षात येताच एकच खळबळ उडाली. कैद्याच्या शोधासाठी नागपूर शहर पोलिस दल कामाला लागले होते. शेवटी त्याला गिट्टीखदान परिसरातून अटक करण्यात आली.

घरात बसला होता लपून

सायमन हा कुख्यात चोरटा आहे. त्याच्याविरुद्ध दुचाकी चोरीचे चार गुन्हे दाखल आहेत. कारागृहातून पळ काढल्यानंतर सायमनने गिट्टीखदानमधील आईचे घर गाठले. तो घरात लपून बसला. अजनी पोलिसांनी छापा घातला. त्याच्या घरीतून त्याला अटक केली. आरोपी सापडताच पोलिसांनी सुटकेचा निश्‍वास सोडला.

जाणून घ्या - नागपूरकरांनो सावधान! घराबाहेर जाणार असाल तर जरा थांबा.. 'ते' ठेऊन आहेत वाईट नजर

संपादन - नीलेश डाखोरे