खापरखेडा (जि. नागपूर) : खापरखेडा पोलिस ठाण्याच्या हद्दीत असणाऱ्या भानेगाव येथे लग्न झालेल्या प्रेयसीच्या विरहात पडलेल्या प्रियकराला नातेवाईकांनी चांगला चोप दिला. प्रियकराने सुद्धा प्रेयसीच्या एका नातेवाईकाला जखमी केल्याची घटना नुकतीच घडली.

पोलिसांनी दिलेल्या माहितीनुसार, प्रेमाच्या विरहात असलेला यशवंत गोविंद यादव (वय ३०, रा. व्हेटनरी कॉलेज जवळ, सुरेंद्रगड, नागपूर) याचे नागपूरच्या छावणी परिसरातील एका मुलीशी मैत्री झाली. मौत्रीचे रूपांतर प्रेमात झाले. मागील जवळपास पाच वर्षांपासून सदर प्रेयसीसोबत प्रेमसंबंध राहिले. प्रेयसी मुलगी लग्नाची असल्याने घरच्यांनी खापरखेडा जवळ असणाऱ्या भानेगाव परिसरातील एका मुलाशी तीन आठवड्यांपूर्वी रीतीरिवाजाप्रमाणे विवाह करून दिला.

मात्र, प्रियकर हा तिच्या विरहात मग्न असल्याने भेटायला शोधाशोध करीत होता. अचानक प्रेयसीच्या पत्ता लागल्यावर भानेगावात आला. घरही शोधले. मात्र, सरळ प्रेयसीच्या घरी जाणे शक्य नसल्याने मार्गावरच एका झाडाजवळ तब्बल दोन तास थांबला. परंतु, प्रेयसी ही प्रियकराला अजिबात दिसली नाही. त्यामुळे हताश होत कसबसा करू लागला.

अधिक वाचा - काळजात धस्स करणारी हिंगणघाटची घटना; काय घडले होते अंकितासोबत गतवर्षी ३ फेब्रुवारीला

आधीच काही नातेवाईकांना कुणकुण होती. नातेवाईकांना जसा प्रियकर झाडाजवळ दिसला त्याला चांगलाच चोप दिला. मात्र, हाणामारीत भेटीसाठी संतप्त असलेल्या प्रियकराने सुद्धा एका नातेवाईकाला धारदार ब्लेडसारख्या शस्त्राने गंभीर जखमी करून टाकले. भेट तर नाहीच. उलट सदर प्रकरण पोलिस ठाण्यात पोहोचले आणि पोलिसांनी नातेवाईक व प्रियकरावर गुन्हे दाखल केले.