नागपूर : राष्ट्रीय स्वयंसेवक संघाचे सरसंघचालक डॉ. मोहनजी भागवत यांची आरटीपीसीआर कोरोना चाचणी पॉझिटीव्ह आली. त्यांना सर्दी, खोकल्याचा त्रास जाणवत असल्यामुळे किंग्जवे हॉस्पीटलमध्ये दाखल करण्यात आले असून त्यांच्यावर उपचार सुरू आहेत.

हेही वाचा - Well Treat Hospital Fire : आगीत चार रुग्णांचा होरपळून मृत्यू, मृतांची संख्या...

कोरोनाने जिल्ह्याला विळखा घट्ट केला असून गेल्या चोविस तासांमध्ये दर दोन तासाला पाच जणांच्या मृत्यूची नोंद करण्यात आली. बाधितांच्या संख्येनेही नवा उच्चांक गाठला. जिल्ह्यात शुक्रवारी गेल्या वर्षभरात एका दिवसातील सर्वाधिक ६ हजार ४८९ बाधित आढळून आले. सतत ६० पेक्षा जास्त मृत्यू व पाच ते साडेसहा हजारांपर्यंत बाधितांच्या संख्येने प्रशासनाच्या उपाययोजनेच्याही चिंधड्या उडविल्याचे चित्र आहे. कोरोनाच्या दुसऱ्या लाटेने सामान्य नागरिकांतही दहशत असून चाचणी केंद्रांवरही रांगा दिसून येत आहे. 

हेही वाचा - कोरोनाची महात्सुनामी! नागपुरात दर दोन तासाला ५ जणांचा मृत्यू; आज नवे साडे ६ हजार रुग्ण 

सक्रिय रुग्ण ५० हजारांच्या उंबरठ्यावर 
सद्यःस्थितीत जिल्ह्यात ४९ हजार ३४७ सक्रिय रुग्ण आहेत. यात शहरात ३२ हजार ५९७ तर ग्रामीण भागात १६ हजार ७५० रुग्ण असून त्यांच्यावर उपचार सुरू आहे. एका आठवड्यापूर्वी २ एप्रिलला जिल्ह्यात ४० हजार ८०७ सक्रिय रुग्ण होते. त्यात आठवडाभरात ८ हजार ५४० रुग्णांची भर पडली. त्यामुळे आता रुग्णालयात बेड्स मिळणेही कठीण झाले आहे.