कामठी : नवीन कामठी पोलिस ठाणे हद्दीतील कामठी-कन्हान मार्गावरील ऑफिसर मेस परिसरात सैनिकाने गळफास लावून आत्महत्या केल्याची घटना रविवारी सकाळी आठ वाजताच्या सुमारास उघडकीस आली. विवेककुमार अखीलेश राय (२७) असे मृत सैनिकाचे नाव आहे.नवीन कामठी पोलिसांनी दिलेल्या माहितीनुसार कामठी येथील सैनिक प्रशिक्षण केंद्रातील ४१४ कन्टोनमेंट ऑफिसर मेस परिसरात सहा महिन्यांपूर्वी सैनिक प्रशिक्षणासाठी आलेले विवेककुमार अखिलेश राय (२७, बोरबायस, संत कबीर नगर, उत्तर प्रदेश) याने आज सकाळी सहा वाजता सुमारास ऑफिसर मेस परिसरातील कडूलिंबाच्या झाडाला नायलॉन दोराने गळफास लावल्याची घटना सीसीटीव्ही कॅमेऱ्यात दिसून आली.

लगेच इतर सैनिकांनी घटनेची माहिती वरिष्ठ अधिकाऱ्यांना दिली असता वरिष्ठ अधिकाऱ्यांनी मृतदेह खाली उतरवून कामठी उपजिल्हा रुग्णालयात उपचारासाठी आणला. डॉक्टरांनी तपासून मृत घोषित केले. घटनेची माहिती नवीन कामठी पोलिस ठाण्यात दिली असता दुय्यम पोलिस निरीक्षक मंगेश काळे, हेड कॉन्स्टेबल दिलीप कुमरे यांनी घटनास्थळाचा पंचनामा करून नवीन कामठी पोलिस ठाण्याला अकस्मात मृत्यूची नोंद केली. पुढील तपास हेडकॉन्स्टेबल दिलीप ठोंबरे करीत आहेत. आत्महत्येचे कारण कळले नसून सैनिकाच्या कुटुंबाला घटनेची माहिती देण्यात आली. मृत सैनिकाचे परिवारातील सदस्य आल्यावर शवविच्छेदन करून मृतदेह नातेवाईकांच्या स्वाधीन करण्यात येणार असल्याचे पोलिसांनी सांगितले.