नागपूर : राज्यात सिंचन क्षेत्रात वाढ करण्याचा दावा शासनाकडून करण्यात येतो. सिंचनाची सोय असल्याची नोंद शेतकऱ्यांच्या सातबारावर आहे. सिंचनाच्या सोयीमुळे शेतकरी दुबार, तिबार पीक घेतात. परंतु, प्रशासनाच्या दरबारी जिल्ह्यात सिंचनाची सोयच नसल्याचे दिसते. वाचून आश्चर्य वाटेल; परंतु हे खरे आहे. प्रशासनाकडून सोयाबीन नुकसानीचा अहवाल तयार करण्यात आला. यात फक्त कोरडवाहू क्षेत्राचाच उल्लेख असून सिंचनाखालील क्षेत्रातील नुकसान शून्य दाखविण्यात आले आहे. प्रशासनाने जिल्ह्यात सिंचित क्षेत्रात सोयाबीन होत नसल्याचा शोध लावल्याचा दिसते. 

हेही वाचा - बाजारात स्टूल टाकून रुग्णांना तपासणाऱ्या डॉक्टरांनी वसंतदादा पाटलांनाच दिला होता धक्का​

जून ते ऑक्टोबर महिन्यादरम्यान झालेली अतिवृष्टी, पूर, परतीच्या पावसामुळे शेतकऱ्यांचे प्रचंड नुकसान झाले. किडीमुळे सोयाबीनचे पूर्ण पीक हातचे गेले. प्रशासनाकडून सर्व्हे करण्यात आला. नागपूर जिल्ह्यात ६८ हजार ९६८ हेक्टरमध्ये सोयाबीन पिकांचे नुकसान झाले. ९१५१३ शेतकरी बाधित झाले. प्रशासनाच्या सर्व्हेनुसार १३ ही तालुक्यात संपूर्ण क्षेत्रामध्येच नुकसान आहे. नुकसानाच्या मदतीसाठी ४६,८९,८४,१०० रुपयांच्या निधीचा प्रस्ताव शासनाकडे पाठविण्यात आला. हे नुकसान फक्त कोरडवाहू क्षेत्रातच दाखविण्यात आले आहे. सिंचित क्षेत्रातील नुकसान शून्य दाखविण्यात आले आहे. जिल्ह्यात सिंचनाची सोय अनेक शेतकऱ्यांकडे आहे. त्याचा उपयोगही त्यांच्याकडून होतो. परंतु, प्रशासनाच्या सर्व्हेत सिंचित क्षेत्रात शून्य नुकसान दाखविण्यात आले आहे.

हेही वाचा - अरेरे हे काय, मृत्यूनंतरही बिबट्यावर कुऱ्हाडीने हल्ला