गेल्या काही दिवसांमध्ये राज्यात अपघातांचे प्रमाण मोठ्या प्रमाणावर वाढले आहे. या अपघाताची अनेक कारणे समोर येतात. यामध्ये काही वेळा चालकांच्या चुकीमुळे अनेक निष्पापांना आपला जीव गमवावा लागतो. तर आतापर्यंत समृद्धी महामार्गावर एकूण ७२९ अपघात झाले आहेत. यात २६२ गंभीर स्वरूपाचे अपघात झालेत. तर ४७ अपघातांच्या घटनेत आजवर १०१ प्रवाशांचा मृत्यू झाला आहे. त्यामुळे, अपघाताचा मुद्दा ऐरणीवर आला आहे.

दरम्यान काल समृध्दी महामार्गावर झालेल्या भीषण अपघातात १२ जणांनी आपला जीव गमावला, ही घटना ताजी असतानाच एक व्हिडीओ सोशल मिडीयावर व्हायरल झाला आहे, यामुळे अनेकांना संताप अनावर झाला आहे. एकीकडे समृद्धी महामार्गावर दररोज अपघात होत असताना दुसरीकडे नागपूर ते पुणे महामार्गावरून जाणाऱ्या एका खासगी ट्रॅव्हल चालकाचा धक्कादायक व्हिडिओ समोर आला आहे.

या व्हिडिओमध्ये ट्रॅव्हल ताशी 100 ते 120 च्या गतीने चालवत असताना चक्क कानात हेडफोन लावून मोबाईलवर चित्रपट बघत असल्याचा व्हिडिओ समोर आला आहे. चालकांच्या या कृत्याने भीषण अपघाताची शक्यता आहे. हा व्हिडीओ समोर आल्यानंतर नेटकऱ्यांनी संताप व्यक्त केला आहे. या ट्रॅव्हल चालकाचे लायसन्स रद्द करा अशी मागणी सध्या नेटकरी करत आहेत.

समृध्दी महामार्गावर काल भीषण अपघातात १२ जणांचा मृत्यू

छत्रपती संभाजीनगरच्या समृद्धी महामार्गावर काल भीषण अपघात झाला. या भीषण अपघातामध्ये बारा जणांचा मृत्यू झाला आहे. यामध्ये लहान बालकाचा देखील समावेश आहे. सैलानी येथील दर्गावरून परतणाऱ्या भाविकांच्या वाहनाला हा अपघात झाला आहे. समृद्धी महामार्गाच्या वैजापूर येथील जांबरगाव टोल नाक्याजवळ ही घटना घडली. मध्यरात्री एक ते दीड वाजण्याच्या दरम्यान हा अपघात झाला आहे.