नागपूर : बर्थडेला बोलावले नाही म्हणून दोन मित्रांनी एकाला मारहाण केली आणि पोटात चाकू मारून जखमी केले. बॉबी मनोजसिंग रावत असे जखमीचे नाव आहे. तर साहील ऊर्फ नानू विनोद सारवान व शुभम उदयभान ठाकूर असे आरोपी मित्रांची नावे आहेत.

पोलिसांनी दिलेल्या माहितीनुसार, बॉबी रावत (वय २५, रा. गणपतीनगर, मानकापूर) याचा मित्र राहुलचा १७ ऑगस्टला बर्थडे होता. बर्थडेला आरोपी साहील ऊर्फ नानू विनोद सारवान (वय २०, रा. म्हाडा क्वॉर्टर, झिंगाबाई टाकळी) याला बोलाविले नव्हते. त्याचा राग साहिलच्या मनात होता. यावरून आरोपी साहिल व आरोपी शुभम उदयभान ठाकूर (वय २५, रा. म्हाडा क्वॉर्टर, झिंगाबाई टाकळी) यांनी संगनमत केले आणि बर्थडेचा कार्यक्रम संपल्यानंतर घरी जात असताना रात्री १२.३० वाजताच्या सुमारास बॉबीला मानकापूर हद्दीतील झिंगाबाई टाकळीतील नेताजी सोसायटीचे बाजूला रस्त्यात अडवून हाथबुक्कीने मारहाण केली.

अधिक माहितीसाठी -  ‘तू प्रेमविवाह केला ना, मग पतीला का सोडले?' वडिलांनी हा प्रश्न विचारताच मुलगी चिडली अन्...

तसेच धारदार चाकू बॉबीच्या पोटात मारून गंभीर जखमी केले. याप्रकरणी फिर्यादी सतीश भास्करराव उपासे (वय ३९, रा. प्लॉट नं. १६, लक्ष्मीनगर, गोधनी रोड, नागपूर) यांनी दिलेल्या तक्रारीवरून मानकापूर पोलिसांनी दोन्ही आरोपीविरुद्ध गुन्हा नोंदवून आरोपींना अटक केली. जखमीवर मेयो हॉस्पिटल येथे उपचार सुरू आहे.

विवाहितेची आत्महत्या

मायग्रेनच्या त्रासाला कंटाळून ३० वर्षीय विवाहितेने घरात गळफास घेऊन आत्महत्या केली. सुनिता राकेश पटेल (रा. प्रसाद सोसायटी, सोनेगाव) असे आत्महत्या केलेल्या विवाहितेचे नाव आहे. पोलिसांनी दिलेल्या माहितीनुसार, राकेश पटेल यांचे १० वर्षांपूर्वी सुनिताशी लग्न झाले होते. त्यांना दोन मुले आहेत. काही महिन्यांपासून सुनिताला मायग्रेनचा त्रास होत होता. तिच्यावर उपचार सुरू होता. परंतु, त्रास वाढतच गेला. त्रासाला कंटाळून सुनिताने रविवारी दुपारी बारा वाजता घरात गळफास घेऊन आत्महत्या केली. याप्रकरणी सोनेगाव पोलिसांनी आकस्मिक मृत्यूची नोंद केली आहे.

संपादन - नीलेश डाखोरे