नागपूर : आदर्श शिक्षक पुरस्कारावरून जिल्हा परिषदेची राज्यभर चर्चा आहे. कारणही तसेच आहे. जिल्हा परिषदेने शासनाने नियम धाब्यावर बसवून विभागीय चौकशी सुरू असलेल्या एका शिक्षकाला हा पुरस्कार जाहीर केला. आता दिलेला पुरस्कार थांबविण्याची नामुष्की ओढवली आहे. पदाधिकारी आणि अधिकाऱ्यांमुळे आदर्श पुरस्काराला गालबोट लागल्याची चर्चा होत आहे.

दरवर्षी जिल्हा परिषदेच्या वतीने जि. प. शाळांमधील शिक्षकांना आदर्श शिक्षक पुरस्कार देऊन गौरविण्यात येते. प्राथमिक गटातून १३ व माध्यमिक गटातून २ अशा १५ शिक्षकांना पुरस्काराने दिली जातो. यंदाही या पुरस्कारासाठी जि. प.च्या शिक्षण विभागाकडे एकूण ३९ प्रस्ताव आले होते. यापैकी ३६ प्राथमिकसाठी तर ३ माध्यमिक गटासाठी आले होते. आदर्श पुरस्कारासाठी शिक्षकाची निवड करताना काही निकष आहेत.

त्या’ आदर्श शिक्षकाच्या विरोधात विभागीय आयुक्तांकडे तक्रार -

यात गैरव्यवहाराच्या आरोपासोबत विभागीय चौकशी सुरू नसणे महत्त्वाचे आहे. परंतु, या निकषाला डावलून विभागीय चौकशी सुरू असलेल्या एका शिक्षकाची आदर्श पुरस्कारासाठी जिल्हा परिषदेने निवड केली. काही पात्र शिक्षकांना डावलल्याचीही ओरड होत असल्याने निवड प्रक्रियेवर प्रश्नचिन्ह उपस्थित करण्यात आले. शिक्षण सभापती पाटील यांनी कोणत्या प्रकारची नियमबाह्य निवड झाली नसल्याचा दावा केला होता. परंतु, त्यांचा दावा फोल ठरला आहे. त्यामुळे आता संबंधित शिक्षकाला जाहीर करण्यात आलेला पुरस्कार थांबिवण्यात आला आहे.

फाइल विभागीय आयुक्तांकडे
विभागीय चौकशी सुरू असलेल्या शिक्षकाची निवड आदर्श पुरस्कारासाठी करण्यात आल्याचे लक्षात आल्याने त्यांचा पुरस्कार थांबविण्याचा निर्णय घेण्यात आला. फाइल विभागीय आयुक्तांकडे पाठविण्यात आली. त्यांच्याकडून निर्णय आल्यानंतर दुसऱ्याची निवड करायची की नाही, याबाबत विचार करण्यात येईल.
-रश्मी बर्वे, अध्यक्ष, जिल्हा परिषद

शिक्षकाची भावनिक पोस्ट व्हायरल
पुरस्कार थांबविण्यात आलेल्या शिक्षकाची भावनिक पोस्ट व्हायरल झाली आहे. यात त्यांनी आपले स्पष्टीकरण देत पुरस्कार सन्मानाने परत करण्याची तयारी दर्शविली. अध्यक्ष यांना तसे पत्र दिले. २०१९ ला काही त्रुटी असलेल्या शिक्षकाला पुरस्कार मिळाल्याचे मित्रांनी सांगितल्याने आपण प्रस्ताव सादर केल्याचे त्यांनी नमूद केले आहे.