नागपूर : वकिलाने गळफास घेऊन आत्महत्या केली. ही खळबळजनक घटना सदरमधील गांधी चौक येथे शनिवारी सकाळी १० वाजताच्या सुमारास उघडकीस आली. संतोष निळकंठ किन्नाके (वय ४६) असे मृताचे नाव आहे.

पोलिसांनी दिलेल्या माहितीनुसार, संतोष यांच्या पत्नी शोभा या कडबी चौक येथे दहावी व बारावीच्या विद्यार्थ्यांची शिकवणी घेतात. शनिवारी सकाळी ७ वाजता त्या शिकवणी वर्गाला गेल्या. याचदरम्यान संतोष यांनी स्वयंपाक घरातील छताच्या हुकला दोरी बांधून गळफास घेतला. १० वाजताच्या सुमारास शोभा या घरी परतल्या. स्वयंपाक घरात संतोष हे गळफास लावलेले दिसले. शेजाऱ्याने सदर घटनेची माहिती पोलिसांना दिली.

अधिक वाचा - मातृत्व अनुभवण्यापूर्वीच झाला बाळाचा मृत्यू, महिलेचं कृत्य पाहून उपस्थितांचेही पाणावले डोळे

माहिती मिळताच सदर पोलिस स्टेशनचे सहायक पोलिस निरीक्षक डी. चोपडे यांच्यासह पोलिसाचा ताफा तेथे पोहोचला. पंचनामा करून पोलिसांनी मृतदेह मेयो हॉस्पिटलकडे रवाना केला. सदर पोलिसांनी आकस्मिक मृत्यूची नोंद करून तपास सुरू केला आहे. संतोष यांच्या आत्महत्येचे कारण कळू शकले नाही. मात्र, त्यांना मूलबाळ नसल्यामुळे ते नैराश्‍यात गेले होते. याच कारणातून त्यांनी आत्महत्या केल्याची चर्चा आहे.

विद्यार्थिनीवर बलात्कार

ओळखीच्या युवकाने १७ वर्षीय विद्यार्थिनीवर बलात्कार केला. ही खळबळजनक घटना शुक्रवारी सायंकाळी उघडकीस आली. याप्रकरणी पोलिसांनी अमित अनिल अधिकारी (वय २७, रा. विटाभट्टी चौक, यशोधरानगर) याच्याविरुद्ध बलात्काराचा गुन्हा दाखल केला आहे. शुक्रवारी दुपारी विद्यार्थिनी मानलेल्या भावासोबत धंतोलीत असलेल्या महाविद्यालयात गेली होती. त्याने मुलीला महाविद्यालयाजवळ थांबण्यास सांगितले. तिचा मानलेला भाऊ हा मित्र योगेश, प्रकाश व यशवंत यांच्या सोबत जेवण आणायला गेला. यावेळी अमित तेथे आला. त्याने बळजबरीने तरुणीला बाजूलाच असलेल्या रेल्वेरूळाजवळील झुडपात नेले. तेथे तिला दमदाटी केली. तिला बदनामी करण्याची धमकी दिली. त्यानंतर तिला शारीरिक संबंधाची मागणी केली. तिने नकार दिला. त्यामुळे त्याने तिच्यावर बळजबरी बलात्कार केला. त्यानंतर तो पळून गेला.

जाणून घ्या - काळजात धस्स करणारी हिंगणघाटची घटना; काय घडले होते अंकितासोबत गतवर्षी ३ फेब्रुवारीला

ब्रेडच्या आमिषाने मुलीचे लैंगिक शोषण

ब्रेड घेऊन देण्याच्या बहाण्याने ३२ वर्षीय युवकाने १३ वर्षीय मुलीचे लैंगिक शोषण केले. ही घटना वाठोडा परिसरात शुक्रवारी रात्री घडली. याप्रकरणी वाठोडा पोलिसांनी अत्याचारासह विविध कलमान्वये युवकाविरूद्ध गुन्हा दाखल केला. स्वप्नील रामटेके असे गुन्हा दाखल करण्यात आलेल्या युवकाचे नाव आहे. पीडित मुलगी शुक्रवारी सायंकाळी घरासमोर खेळत होती. ब्रेड देण्याच्या बहाण्याने स्वप्नील याने तिला घरात बोलाविले. तिच्यावर अत्याचार केला. मुलगी रडत घरी आली. तिने आईला अत्याचाराची माहिती दिली. मुलीसह आईने वाठोडा पोलिस स्टेशन गाठले. महिलेच्या तक्रारीवरून वाठोडा पोलिसांनी गुन्हा दाखल केला.