नागपूर : कोरोनाच्या संकटकाळात व्यवसाय बंद असल्याने आर्थिक अडचणीत सापडलेल्या एका वृद्ध सलून व्यावसायिकाने गांधीसागर तलावात उडी घेऊन आत्महत्या केली. याप्रकरणी गणेशपेठ पोलिसांनी आकस्मिक मृत्यूची नोंद केली. दिलीप बाबूराव कापसे (60, रा. यादवनगर, कामठी रोड) असे मृताचे नाव आहे.
याबाबत पोलिसांनी दिलेल्या माहितीनुसार, दिलीप कापसे यांचे राणी दुर्गावती चौकात केश कर्तनालय आहे. ते मुलगा व सुनेसह राहतात. कोरोनाचा प्रादुर्भाव रोखण्यासाठी 21 मार्चपासून देशात लॉकडाऊन जाहीर झाला. तेव्हापासून त्यांचा व्यवसाय बंद होता. यादरम्यान त्यांना आर्थिक अडचणींचा सामना करावा लागला. घरचा खर्च भागवणे कठीण झाल्याने दोन दिवसांपूर्वी ते घरातून निघून गेले. त्यानंतर गांधीसागर तलावात उडी घेऊन आत्महत्या केली.
बुधवारी सकाळी त्यांचा मृतदेह तलावात तरंगताना दिसला. पोलिसांनी मृतदेह शवविच्छेदनासाठ पाठवले व आकस्मिक मृत्यूची नोंद केली. या घटनेने शहरातील नाभिक समाजात हळहळ व्यक्त करण्यात येत आहे. कोरोनाकाळात देशभरातील लाखो लोकांचे व्यवसाय बुडाले असून, त्यांच्यावर उपासमारीची वेळ आली आहे, हे विशेष.
मार्च महिन्यापासून लॉकडाऊन करण्यात आल्याने सर्वच व्यवसाय बंद होते. परंतु सध्या एक जूनपासून हळूहळू व्यवसायांना परवानगी दिली जात आहे. काही दुकाने सम-विषम नियमानुसार उघडली जात आहेत. परंतु सलून व्यावसायिकांबाबत सरकारने अद्याप निर्णय घेतला नसल्याने राज्यातील सर्वच सलून दुकाने बंद आहेत. नाभिक समाजातर्फे सर्व नियमानुसार इतर व्यवसायांप्रमाणे सलून दुकाने उघडण्यास परवानगी देण्याची मागणी यापूर्वी अनेकदा सरकारकडे करण्यात आली.
लॉकडाऊनच्या काळात विविध सामाजिक संस्था, लोकप्रतिनिधी तसेच समाजसेवकांच्या वतीने काही प्रमाणात विविध वस्तू, किराणा तसेच जीवनावश्यक वस्तूंचा पुरवठा करण्यात आला. त्यामुळे गरीब, गरजूंना त्याचा आधार झाला. परंतु एक जूनपासून सर्व व्यवसाय सामाजिक अंतर, मास्क तसेच इतर नियमांचे पालन करून हळूहळू पूर्वपदावर येत असल्याने सारेच आपापल्या व्यवसायात लागले आहेत.
त्यामुळे गरजूंकडे कुणाचे फारसे लक्ष जात नाही. सलून व्यावसायिकांचा प्रश्न सरकारने त्वरित सोडवावा, त्यांना आर्थिक मदत करावी, अशी मागणी समाजबांधवांकडून होते आहे. मागील आठवड्यात गोंदियात एका सलून व्यावसायिकाने स्वत:ला जाळून घेऊन आत्महत्येचा प्रयत्न केला होता.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.