नागपूर : साथरोग प्रतिबंधात्मक कायद्यानुसार मनपा आयुक्त तुकाराम मुंढे यांनी सर्व दुकाने, इंडस्टिज बंद ठेवण्याचे निर्देश दिले होते. निर्देश झुगारून बिस्किटचे उत्पादन सुरू ठेवणाऱ्या सुंदर बिस्किट इंडस्टिजला महापालिकेने 65 हजारांचा दंड ठोठावला.

कोरोनाच्या पार्श्‍वभूमीवर शहरातील सर्व दुकाने, आस्थापना, इंडस्टिज बंद करण्याबाबत मुंढे यांनी शुक्रवारी निर्देश दिले. शहरातील बहुतांश दुकाने आज बंद होती. मात्र, कोराडी मार्गावरील सुंदर बिस्किट इंडस्टिजमध्ये बिस्किटचे उत्पादन सुरू असून, तेथे 50 ते 60 कर्मचारी असल्याची माहिती मंगळवारी झोनचे सहायक आयुक्त हरीश राऊत यांना मिळाली.

आश्‍चर्य आहे! त्या गावातील नळातून येतो चहासारखा द्रव

आयुक्त मुंढे यांच्या निर्देशानुसार त्यांनी आरोग्य निरीक्षक व उपद्रव शोधपथकासह दुपारी साडेबाराच्या सुमारास सुंदर बिस्किट इंडस्टिजवर धाड टाकली. यावेळी येथे कर्मचारी बिस्किटचे उत्पादन करीत असल्याचे आढळून आले. महापालिकेने सुंदर बिस्किट इंडस्टिज व्यवस्थापनावर 65 हजारांचा दंड ठोठावला. बंददरम्यान इंडस्टिज सुरू ठेवल्याप्रकरणी ही पहिलीच मोठी कारवाई महापालिकेने केली. त्यामुळे आता इतर इंडस्टिज व्यवस्थापकांत खळबळ उडाली आहे.

कोरोना व्हायरसच्या प्रतिबंधासाठी राज्य शासनाने अत्यावश्‍यक सेवा वगळता सर्वच बंद ठेवण्याचे आदेश दिले आहेत. राज्यातील मोठ्या शहरांमध्ये संपूर्ण लॉकडाऊन करण्याचा इशारा दिला आहे. त्याच पार्श्‍वभूमीवर दुकाने, रेस्टॉरंट, सलून, चहा, पानटपऱ्या बंद आहेत.