नागपूर ः राज्यात बारावीची परीक्षा २३ एप्रिल ते २१ मे तर दहावीची परीक्षा २७ एप्रिल ते २१ मेदरम्यान घेण्यात येणार आहे. या सर्व परीक्षा ऑफलाइन पद्धतीने होणार असून त्यासाठी शाळा व कनिष्ठ महाविद्यालयस्तरावर होणार आहे. मात्र, याप्रमाणे परीक्षा घेण्यासाठी विभगाकडे तोकडीच यंत्रणा असल्याचे चित्र आहे. विशेष म्हणजे परीक्षेचे पावित्र्य कसे राखणार याबाबत शाशंकता निर्माण होणार आहे.

राज्यात कोरोनाचा प्रादुर्भाव आहे. यामुळे त्याचा परिणाम दहावी आणि बारावीच्या परीक्षांवर पडेल असे चित्र निर्माण झाले. त्यामुळे शनिवारी (ता. २०) शिक्षणमंत्र्यांनी याबाबत सर्व शक्यता फेटाळून लावत, ऑफलाइन परीक्षा घेण्याची घोषणा केली. याशिवाय विद्यार्थ्यांनी वेळ वाढवून देत, दिलासा दिला. याशिवाय त्या-त्या विद्यार्थ्यांच्या शाळा आणि कनिष्ठ महाविद्यालयातच परीक्षा घेण्यात येणार आहे. 

हेही वाचा - भाजप आक्रमक : गृहमंत्री देशमुखांच्या राजीनाम्यासाठी चंद्रशेखर बावनकुळे यांच्या नेतृत्वात आंदोलन

यापूर्वी विभागीय शिक्षण मंडळाद्वारे विशिष्ट केंद्रांची निवड करुन त्या ठिकाणी परीक्षांचे आयोजन करण्यात यायचे. बारावीसाठी विभागात ४७१ परीक्षा केंद्र तर दहावीसाठी ६९२ परीक्षा केंद्र तयार करण्यात आली होती. त्यासाठी शहरात जवळपास ९ कस्टडीचा समावेश करण्यात आला होता. या

शिवाय प्रत्येक तालुक्यात एक तर मोठ्या तालुक्यात दोन कस्टडी तयार करण्यात आल्यात. या कस्टडीमध्ये त्या-त्या दिवशीचा पेपर नेण्याची व्यवस्था करण्यात आली होती. मात्र, आता परीक्षा शाळा आणि कनिष्ठ महाविद्यालयस्तरावर होणार असल्याने विभागाकडून कस्टडीची संख्या वाढविण्याची गरज आहे. मात्र, त्यामुळे पेपर फुटण्याची शक्यता नाकारता येत नाही. याशिवाय शिक्षक आणि प्राध्यापकांवरच सर्व परीक्षेचा भार येणार आहे.

हेही वाचा - दुसरी लाट त्सुनामीच : नागपूर जिल्ह्यात २७ हजार...

मासकॉपीची शक्यता

राज्यात प्रथमच शाळा व कनिष्ठ महाविद्यालयस्तरावर घेण्यात येणार आहे. या प्रकाराने शाळांचा निकाल वाढविण्यासाठी मोठ्या प्रमाणात मासकॉपी होण्याची शक्यता नाकारता येत नाही. विशेष म्हणजे आताही विभागातील काही केंद्रावर मोठ्या प्रमाणात कॉपीचे प्रकार घडत असल्याचे दिसून येते. शिवाय दुर्गम भागातील शाळांमध्ये हा प्रकार अधिकच वाढण्याची शक्यता नाकारता येत नाही. 

संपादन - अथर्व महांकाळ