नागपूर : महामेट्रोने अप्रतिम कलाकृतीने शहराच्या आकर्षणात भर घातली. महामेट्रो कामठी रोडवर गड्डीगोदाम येथे चार मजली पूल तयार करीत असून त्यासाठी लोखंडी ढाचा तयार करण्याचे काम बुटीबोरी एमआयडीसीमध्ये अंतिम टप्प्यात आहे. हा चार मजली पूल आशिया खंडातील पहिलाच असल्याचा दावा कंपनीने केला असून त्याचा ढाचा तयार करण्यात येत आहे. या पुलासाठी १ हजार ६३४ टन लोखंडाचा वापर करण्यात आला आहे.

सीताबर्डी ते कामठी मेट्रो मार्गावर झिरो माईल स्टेशनपर्यंत मेट्रो धावत आहे. त्यापुढील कामेही अंतिम टप्प्यात असून याच मार्गावर गड्डीगोदाम रेल्वे पुलावरून मेट्रो तसेच चारचाकी वाहतूक धावणार आहे. येथे चारमजली पूल तयार होणार आहे. जमिनीवरून जड वाहतूक, त्यावर भारतीय रेल्वे धावणार आहे. त्यानंतर चारचाकी वाहतूक व त्यावर मेट्रो धावणार आहे. हा पूल पूर्णपणे लोखंडी असून बुटीबोरी

येथील एमआयडीसीतील एका खासगी कंपनीमध्ये पुलाचे ट्रायल असेंब्लिंग (पूल उभा करण्याचे प्रात्यक्षिक) सुरू आहे. कंपनीच्या परिसरात जमिनीपासून २४ मीटर उंच, ८० मीटर लांब व १८ मीटर रुंद लोखंडाचा ढाचा दिसून येत आहे. या पुलाच्या ढाच्याबाबत येथील कर्मचाऱ्यांशी संवाद साधला असता त्यांनी मेट्रोच्या गड्डीगोदाम येथे चारमजली पुलाचे स्ट्रक्चर तयार करण्यात येत असल्याचे सांगितले. दरम्यान, गड्डीगोदाम येथील या चारमजली पुलाचे कामाचे डिझाईन बदलविण्यात आले आहे. त्यामुळे नव्या डिझाईनचा हा पूल शहरासाठी आकर्षणाचे केंद्रबिंदू ठरणार आहे.

पाऊण लाख नटबोल्टचा वापर चारमजली पुलाचा ढाचा जोडण्यासाठी ७८ हजार बोल्टचा वापर करण्यात आला आहे. या बोल्टला ‘हाय स्ट्रेन्थ फ्रिक्शन ग्रीप’ असेही म्हटले जाते.

२४ मीटर उंचावरून धावणार मेट्रो

गड्डीगोदाम येथे महिनाभरात चारमजली पुलाचा ढाचा दोन पिलरवर बसविण्यात येईल. जमिनीपासून २४ मीटर उंचावर मेट्रो ट्रॅक राहणार आहे. त्याखाली, अर्थात जमिनीपासून १४ मीटर उंचावर चारचाकी, दुचाकीसाठी रस्ता, त्याखाली भारतीय रेल्वेचे ट्रॅक राहणार असून जमिनीवरून जड वाहतूक धावणार आहे.

१०० वर्षे आयुष्य

या लोखंडी पुलाचे आयुष्य शंभर वर्षे असेल, असे या कंपनीचे व्यवस्थापकीय संचालक अंकित चोखानी यांनी सांगितले. गेल्या साडेतीन महिन्यांपासून १५४ कर्मचारी पुलाचे प्रत्येक सुटे भाग तयार करीत असून ५४ तज्ज्ञ अधिकारी, कर्मचाऱ्यांनी पूल उभारल्याचेही ते म्हणाले.