नागपूर : पोलिसांना साप्ताहिक सुटीच्या दिवशी कर्तव्यावर हजर होण्याचा आदेश वरिष्ठांनी दिल्यास त्या दिवशीचे अतिरिक्त वेतन देण्याचे निर्देश आहेत. तरीही नागपूर शहर आयुक्तालयातील अनेक पोलिस कर्मचाऱ्यांना वरिष्ठ अधिकारी साप्ताहिक सुटीच्या दिवशी कर्तव्यावर बोलवतात. परंतु, या सेवेची कुठेही नोंद होत नाही तसेच अतिरिक्त वेतनही देण्यात येत नसल्याचा प्रकार उघडकीस आला आहे. अनेक पोलिस कर्मचाऱ्यांनी आपल्या मनातील खदखद सोशल मीडियावर व्यक्त केली आहे.

सूत्रांनी दिलेल्या माहितीनुसार, राज्यातील वाढती लोकसंख्या, वाढते शहरीकरण तसेच विविध धार्मिक सण जसे गणेशोत्सव, ईद, नवरात्रोत्सव, होळी, दिवाळी तसेच राजकीय स्तरावरील महत्वाच्या व्यक्तींची वरचेवर राज्यातील विविध शहरात भेटी होत असतात.

क्लिक करा - बापरे!; पहाटे साडेपाच वाजता शासकीय बालसुधारगृहात दोन अल्पवयीन मुलांनी केली आत्महत्या

अशा विविध कारणांस्तव पोलिस अधिकारी, कर्मचारी यांना बंदोबस्तासाठी कर्तव्याचा कालावधी बरेचदा १२ तासांपेक्षा जास्त काळ बंदोबस्त करावा लागतो. अपुऱ्या मनुष्यबळामुळे राज्यातील पोलिस दलातील अधिकारी, कर्मचारी यांच्या साप्ताहिक सुट्या रद्द केल्या जातात.

गृह विभागाच्या २००४ च्या निर्णयानुसार पोलिस विभागातील अधिकारी, कर्मचारी यांना साप्ताहिक सुटीच्या मोबदल्यात मूळ वेतन आणि दैनिक भत्ता दिला जातो. मात्र, सध्या नागपूर आयुक्तालयात कार्यरत अनेक पोलिस अधिकारी आणि कर्मचाऱ्यांना साप्ताहिक सुटीच्या दिवशी कर्तव्यावर बोलावले जाते. मात्र, त्या कर्तव्याची कुठेही नोंद होत नाही तसेच मूळ वेतनाप्रमाणे एका दिवसाचा पगारही दिला जात नसल्याची माहिती समोर आली आहे.

अधिक माहितीसाठी - डॉ. शीतल आमटे- करजगी यांचं शेवटचं चॅटिंग कुणाशी? पासवर्ड स्वतःचे डोळे ठेवल्यानं वाढल्या अडचणी

कर्मचाऱ्यांना कौटुंबिक ताण

कर्मचारी साप्ताहिक सुटीच्या दिवशी घरातील कामे, नातेवाईक आणि मुलांना वेळ देतात. मात्र, अचानक वरिष्ठांचा हजर होण्याचा आदेश येत असल्याने कुटुंबाचा हिरमोड होतो. त्यामुळे कर्मचाऱ्यांना कौटुंबिक ताण सहन करावा लागतो.

संपादन - नीलेश डाखोरे