नागपूर : एकिकडे उपराजधानीत कोरोनाचा वाढता संसर्ग चिंताजनक असताना उपचारातून बरे होऊन कोरोनाबाधित घरी जात आहेत, ही दिलासा देणारी बाब आहे. आतापर्यंत 8 जण घरी परतले आहेत. यात पुन्हा तिघांची भर पडली असून मंगळवारी रात्री उशीरा जरिपटका येथील 3 बाधित रुग्ण ठणठणीत होऊन घरी परतले. विशेष असे की, कोरोनावर एका पक्षघात असलेल्या व्यक्तीने मात केली.
कोरोनाच्या धास्तीने उपराजधानी चिंताग्रस्त आहे. मात्र मंगळवारी मनाला समाधान देणारी एक घटना घडली. खामला येथील रुग्णाच्या संपर्कात आलेल्या 3 बाधितांना 20 दिवसांच्या उपचारानंतर ठणठणीत झाल्यानंतर घरी सोडण्यात आले. त्यामुळे करोनावर यशस्वीरित्या मात करणाऱ्या नागपुरातील रुग्णांची संख्या आता 11 झाली आहे. 11 मार्च रोजी नागपुरात पहिला कोरोनाबाधित रुग्ण आढळला होता. तेव्हापासून आतापर्यंत बाधितांचा आकडा 56 वर पोहोचला आहे. यातील 11 जण बरे झाले आहेत. तर 45 जणांवर मेयो आणि मेडिकलमध्ये उपचार सुरू आहेत. एकाच दिवशी 3 बाधितांनी कोरोनावर मात केल्यानंतर इतरही बाधितांना बळ मिळत असल्याचे डॉक्‍टर सांगतात. बाधित असल्याचा अहवाल आल्यानंतर उपचारानंतर घशातील स्त्रावाचे दर आठ दिवसानी नमुने घेऊन त्याची चाचणी केली गेली. यात त्याच्या तीनही चाचण्या निगेटिव्ह आल्या. यामुळेच मेडिकलमधून सुटी देऊन घरी पाठविण्यात आले.

सविस्तर वाचा - दारूला शोधला हा पर्याय; दारुड्यांची नवी शक्कल

कोरोनाशी लढताना ते जिंकले

मेडिकलचा कोरोना वॉर्ड म्हणजे पेईंग वॉर्ड आहे. येथे कोरोनाबाधितांवर योग्य उपचार सुरू आहेत. यामुळेच कोरोनाची प्रचंड दहशत पसरली असताना उपराजधानीत कोरोनाच्या बाधेमुळे दाखल झालेले रुग्ण बरे होऊन घरी जात आहेत. विशेष असे की, डेंजर झोन मध्ये असलेला पक्षघात झालेला कोरोनाबाधित बरा झाला आहे, ही समाधानकारक बाब आहे. वीस दिवसात 11 जण मेडिकल आणि मेयोतून बरे होऊन गेले. कोरोना वॉर्डातून बाहेर निघताना त्या तिघांसाठी वॉर्डातील डॉक्‍टर, परिचारिका तसेच आरोग्य कर्मचाऱ्यांना शुभेच्छा दिल्या. डॉक्‍टर, परिचारिकांचे आभार मानत असताना रुग्णांच्या डोळ्यातून पाणी आले. यावेळी टाळ्या वाजवून त्यांचे मनोबल वाढवण्यात आले.