नागपूर : दररोज मोठ्या संख्येने कोरोनाबाधित आढळून येत असून आकडेवारीत घोळ असल्याची शंका एकाच व्यक्तीच्या दोन वेगवेगळ्या तपासणी अहवालामुळे निर्माण झाली आहे. नागपूर पशुवैद्यकीय महाविद्यालयात तपासणी करण्यात आल्यानंतर एका तरुणीचा अहवाल पॉझिटिव्ह घोषित करण्यात आला. त्याच तरुणीने खाजगी लॅबमध्ये तपासणी केल्यानंतर अहवाल निगेटिव्ह आला. त्यामुळे नेमका कुणावर भरवसा ठेवावा? असा प्रश्न या महिलेसोबतच नागपूरकरांपुढे उभा ठाकला आहे. 

सध्या ती काय करते? 'स्वदेश' फेम गायत्री जोशीची कहाणी, वाचा...

एकाच महिलेच्या दोन वेगवेगळ्या अहवालाची बाब स्थायी समिती अध्यक्ष पिंटू झलके यांनी पुढे आणली. वाठोडा येथील राधाकृष्णनगरातील एका २३ वर्षीय तरुणीच्या घशातील द्रवाचे नमुने महापालिकेने ७ ऑगस्टलला तपासणीसाठी घेतले. या महिलेचे नमुने नागपूर पशुवैद्यकीय महाविद्यालयात तपासणीसाठी पाठविण्यात आले. ८ ऑगस्टला पशुवैद्यकीय महाविद्यालयाने नमुने तपासणीनंतर या तरुणीचा अहवाल कोरोना पॉझिटिव्ह असल्याचा तयार करण्यात आला.

नागपुरात बहरले सोनू सूदचे प्रेम; शंकरनगरातील ब्रेड पकोडा व कटिंग चहाचा होता दिवाना 

मात्र कुठलेही लक्षणे तसेच त्रास नसल्याने या तरुणीने एका खाजगी लॅबमध्ये १० ऑगस्टला स्वॅब तपासणी केली. यात ती निगेटिव्ह असल्याचे दाखविण्यात आले. त्यामुळे नेमका कुणाचा अहवाल खरा आणि कुणाचा खोटा? असा प्रश्न निर्माण झाला आहे. केवळ ही तरुणीच नव्हे तर या अहवालावरून नागरिकांतही आता संभ्रम निर्माण झाला आहे. यापूर्वीही असेच एक प्रकरण उघडकीस आले होते. त्यामुळे दररोज वाढणारी बाधितांच्या आकड्यात घोळ तर नाही ना? अशी शंकाही उपस्थित केली जात आहे. 

आयुक्तांच्या गांभीर्यावर प्रश्नचिन्ह 
तरुणींच्या दोन वेगवेगळ्या अहवालाची बाब गंभीर आहे. याप्रकरणाचे गांभीर्य ओळखून स्थायी समिती अध्यक्ष पिंटू झलके यांनी आयुक्त तुकाराम मुंढे यांच्याशी फोनवर संपर्क साधला. परंतु या गंभीर बाबतीतही त्यांनी फोन उचलला नाही, असे झलके यांनी सांगितले. त्यामुळे आयुक्तांच्या गांभीर्यावरही प्रश्नचिन्ह उपिस्थत झाले आहे. 
(संपादन : प्रशांत राॅय)