नागपूर : मानवी जीवनाच्या आरोग्यास पोषक असलेल्या या रानभाज्यांचा उपयोग स्वयंपाकघरात फायद्याचा असला तरी, त्याविषयी अनेकजण अनभिज्ञ आहेत. या भाज्यांमधून मिळणारे गुणसत्व निश्‍चितच बहुपयोगी असून, यासाठी अधिकाधिक प्रसार गरजेचा आहे. असे सांगताना विष्णू मनोहर यांनी "रानभाज्या खा, स्वस्थ राहा', असे आवाहन ऑनलाईन मुलखतीत केले. 

गिरीश गांधी फाऊंडेशन व वनराई फाऊंडेशनच्या संयुक्त विद्यामाने "रानभाज्यातून तृप्ती व आजारातून मुक्ती' या विषयावर या ऑनलाईन मुलाखतीचे आयोजन करण्यात आले. रेखा दंडिगे घिया यांनी घेतलेल्या मुलाखतीत त्यांनी निवडक रानभाज्या शिजविण्याची कृती देखील सांगितली. अनेकांना रानभाजीची चव आवडत नाही तर काहींना याविषयी भिती वाटते. मात्र आरोग्यास गुणकारी असल्याने नागरिकांनी भाज्यांचा उपयोग वाढविण्याची गरज असल्याचे मनोहर म्हणाले. शिवाय नागरिकांच्या प्रश्‍नांचे निराकरण करण्यासही मनोहर विसरले नाहीत. 

मोठी बातमी : निरोगी व्यक्‍तींवर होणार कोरोना प्रतिबंधक लशीची चाचणी, नागपुरातील या रुग्णालयात सुविधा... 

पूर्वी कोकणात पिकणाऱ्या रानभाज्यांची आता विदर्भातही लागवड होते. मात्र गरज भागविण्यापुरती होत लागवड होत नसल्याने प्रत्येकाने रानभाज्या घरात पिकविणे आवश्‍यक असल्याचे मनोहर म्हणाले. या भाज्या मधुमेह व हृदयविकाराच्या आजार असलेल्या व्यक्‍तीची प्रतिकार शक्ती वाढविण्यास उपयुक्त असल्याचे त्यांनी सांगितले. प्रसंगी विष्णू मनोहर यांनी तरोट्यापासून भजी तयार केले. नदी किनारी उगविणाऱ्या रानभाज्या कोणत्या यासाठी नजर गरजेची असते. या भाज्याचे संशोधन होणे गरजेचे असल्याचे आवाहन त्यांनी केले. जोपर्यंत या भाज्यांना व्यवसायिक स्वरुप येणार नाही तोपर्यंत त्याचे महत्त्व प्रकाशात येणार असल्याचे देखील मनोहर म्हणाले. यावेळी कमतला. खारखुटी, बतरा, तरोटा, रानदुधी, दिवती या रानभाज्याचे महत्त्व पटवून सांगितले. निलेश खांडेकर यांनी प्रास्ताविक केले तर अजय पाटील यांनी आभार मानले. यावेळी विजय जथे, र्मिंलद देशकर उपस्थित होते.