नागपूर  : राष्ट्रसंत तुकडोजी महाराज नागपूर विद्यापीठाने वर्षभरासाठी कुठल्याही प्रकारची शुल्कवाढ करण्यात येणार नसल्याचा निर्णय घेतला आहे. त्यामुळे कोरोना काळात विद्यार्थ्यांना मोठा दिलासा मिळणार आहे. नागपूर युनिर्व्हसिटी टिचर्स असोसिएशनने याबाबत कुलगुरूंकडे मुद्दा लावून धरला होता. नुकत्याच झालेल्या व्यवस्थापन परिषदेच्या बैठकीत यावर शिक्कामोर्तब करण्यात आले.

राज्यात कोरानाचा प्रादुर्भाव वाढल्याने उद्योगधंद्यासह विविध व्यावसायिक प्रतिष्ठाने बंद करण्यात आलीत. यामुळे अनेकांचे रोजगार गेलेत. शेतीवर मोठा परिणाम झाला. रोजगाराची संसाधनेही हिरावल्या गेलीत. शिवाय कुटूंबीयांवर आर्थिक संकट ओढविले. त्यामुळे विद्यार्थ्यांना शुल्क भरण्यासाठीही पालकांकडे पैसे नाही. त्यामुळे विद्यार्थ्यांना शुल्क भरता येणे शक्‍य नाही.

इग्नूचाही प्रादेशिक भाषांवर भर, या भाषेच्या चित्रफितींचे काम पूर्ण...

विद्यापीठाकडून दरवर्षी शुल्कवाढ करण्याचा प्रस्ताव असतो. कोरोनामुळे जिल्हावार बंदी लागू आहे. अशा परिस्थितीचा विद्यार्थ्यांच्या जीवनावर परिणाम होण्याची शक्‍यता आहे. शिवाय शुल्कवाढ झाल्यास विद्यार्थ्यांचे शिक्षण मध्येच थांबण्याची शक्‍यता निर्माण झाली होती. नागपूर युनिर्व्हसिटी टिचर्स असोसिएशनने याबाबत कुलगुरूंकडे निवेदन सादर करीत यावर्षी शैक्षणिक सत्रात कुठल्याच प्रकारची शुल्कवाढ होऊ नये अशी मागणी केली होती. तसेच व्यवस्थापन परिषदेचे सदस्य डॉ. नितीन कोंगरे यांनी सातत्याने हा विषय कुलगुरूंकडे लावून धरला होता. त्यातूनच गुरूवारी (ता.2) पार पडलेल्या बैठकीत विद्यापीठाने यंदाच्या शैक्षणिक वर्षात कुठल्याच प्रकारची शुल्कवाढ न करण्याचा निर्णय घेतला आहे. विशेष म्हणजे त्यामुळे विद्यापीठातील लाखो विद्यार्थ्यांना याचा फायदा मिळणार आहे.

कोरोना काळात विद्यार्थी मोठ्या आर्थिक अडचणीत सापडला आहे. त्यामुळेच नुटातर्फे त्यांच्याकडून कुठलेही शैक्षणिक शुल्क घेण्यात येऊ नये अशी भूमिका मांडण्यात आली होती. त्याच भूमिकेतून मागणीचा पाठपुरावा करीत विद्यापीठाकडून ती मागणी मान्य करुन घेण्यात संघटनेला यश आले.
डॉ. नितीन कोंगरे,
व्यवस्थापन परिषद सदस्य.
राष्ट्रसंत तुकडोजी महाराज नागपूर विद्यापीठ.