कळमेश्वर (जि.नागपूर): कोरोना, लॉकडाउनमुळे लग्न हंगाम वाया गेला. व्यवसाय ठप्प झाल्याने फोटोग्राफर, व्हिडिओ शूटिंग व्यावसायिक व व्यवसायावर अवलंबून असणारे आर्थिक संकटात सापडले आहेत. त्यात लॉकडाउन संपल्यानंतर येणाऱ्या मंदीमुळे कुटुंबाचा उदरनिर्वाह चालवायचा कसा, अशी चिंता फोटोग्राफर्सना लागली आहे.

अधिक वाचा :  पोलिस मासेमारांच्या घरी जाउन का धमकावितात बरे ?

कुटुंबाचा उदरनिर्वाह चालवायचा कसा?
तालुक्‍यात फोटोग्राफर, व्हिडिओग्राफर, व्हिडिओमिक्‍सिंग, अल्बम डिझयनर, क्रेन, ड्रोन ऑपरेटर मिळून सुमारे44 जण आहेत. मागील दिवाळीपासून सुरू झालेला लग्न हंगाम जूनपर्यंत सुरू राहणार होता. या काळात लग्नतिथी जास्त होत्या. यामुळे अनकांनी नवीन कॅमेरा, व्हिडिओ, कॅमेरे खरेदी केले होते. त्यासाठी खासगी फायनान्स करणाऱ्या कंपन्यांकडून कर्जही काढले आहे. मात्र, कोरोनाचा फटका इतर व्यवसायाप्रमाणे फोटोग्राफरलाही बसला आहे. आज या व्यवसायात 60टक्के लोक 30 ते 50 वयोगटातील आहेत. ज्यांनी कर्ज घेतले आहे त्यांचे कर्जाचे हप्ते सोडा; पण दैनंदिन खर्च कसा भागवायचा असा प्रश्न त्यांच्यासमोर आहे.

अधिक वाचा :  खासगी जिनींगमध्ये भाऊ, क्‍विंटलमागे हजाराचे नुकसान रे?

फोटोग्राफर्सची वाढली चिंता
काही ऑपरेटर नामांकित फोटोग्राफरकडे काम करतात. त्यांना सध्या सांभाळून घेतले आहे. पण, तेही किती महिने? त्यांचा खर्च उचलतील या फोटोग्राफरला पुढील महिन्यांची चिंता सतावू लागली आहे. कारण, लॉकडाउन उठल्यावर लगेच कोणी फोटो काढण्यासाठी स्टुडिओमध्ये येणार नाही. यामुळे दुकान भाडे, लाईट बिलचा खर्च निघेल की नाही, मुलांचे नवीन शैक्षणिक वर्ष, कर्जाचा हप्ता दिला जाईल की नाही, या चिंतेने फोटोग्राफरला ग्रासले आहे. भविष्यात काय होईल, या विचाराने रात्री झोप येत नसल्याचे प्रतीक कोल्हे, किशोर पंचभाई, महेंद्र धकाते, राजेश वरनकर, प्रदीप गणोरकर, अजय खेडकर, आशीष ढोले यांनी सांगितले

अधिक वाचा : आम्हीपण डॉक्‍टर्स ना...मग तुमचा आमच्यावर भरोसा नाही काय ?

पुढील तीन महिने तरी सांभाळून घ्या !
दरवर्षी उन्हाळ्याच्या सिझनमध्ये तीन ते चार लाख कमवायचो, मात्र यंदा विवाह सोहळे नसल्याने आर्थिक अडचण निर्माण झाली आहे. शासनाने ही गंभीर बाब लक्षात घेऊन कमीत कमी पुढील तीन महिने तरी आठ हजारांची मदत करावी.
- अरविंद लिंगायत
अध्यक्ष फोटोग्राफर असोसिएशन
कळमेश्वर तालुका