नागपूर : महानगरपालिकेचे आयुक्त तुकाराम मुंढे यांनी नागपूर स्मार्ट ऍन्ड सस्टेनेबल सिटी डेव्हलपमेंट कार्पोरेशन लिमिटेडचे (एनएनएससीडीसीएल) सीईओ असल्याचे गैरकारभार केला. याबाबत चौकशी करण्यात यावी, अशी मागणी करणारी याचिका महापौर संदीप जोशी आणि सत्तापक्षनेते संदीप जाधव यांनी संयुक्तपणे जिल्हा व सत्र न्यायलयात दाखल केली. या याचिकेवर 15 जुलै रोजी सुनावणी होणार आहे. 

महानगरपालिकेचे आयुक्त तुकाराम मुंढे यांनी एनएनएससीडीसीएल संचालक मंडळाला विश्‍वासात न घेता सीईओपदी असल्याचे सांगून अनेक निर्णय घेतले. यात प्रकल्प रद्द करणे, कर्मचाऱ्यांना पूर्वसूचना न देता काढणे, बॅंकेची दिशाभूल करून स्वतःच्या स्वाक्षरीसह एका कंपनीला 20 कोटी रुपये देणे अशी प्रकरणे सामील आहेत.

कंपनीचे अधिकृत सीईओ नसताना केलेले आर्थिक व्यवहार गैरप्रकारात मोडणारे आहेत. त्यामुळे महापौर संदीप जोशी, सत्तापक्षनेते संदीप जाधव यांनी 22 जूनला सदर पोलिस स्टेशनला तक्रार केली. आठ दिवसांत या तक्रारीवर काहीही झाले नसल्याने 30 जून रोजी पोलिसांना स्मरणपत्र देण्यात आले.

'तुला कोरोना झाला... आता तू माझ्याजवळ येऊ नकोस...' पतीने घेतला हा टोकाचा निर्णय..

हे प्रकरण आर्थिक गुन्हे शाखेकडे वर्ग करण्यात आले होते. परंतु, त्यापुढे काहीही झाले नसल्याने महापौर संदीप जोशी, सत्तापक्षनेते संदीप जाधव यांनी जिल्हा व सत्र न्यायालयाचे दार ठोठावले. 

पोलिसांचे "स्मार्ट' उत्तर 
याप्रकरणी आर्थिक गुन्हे शाखेने महापौर संदीप जोशी, सत्तापक्षनेते संदीप जाधव यांना एक पत्र पाठवून ही तक्रार पोलिसांशी संबंधित नसल्याचे सांगितले. विशेष म्हणजे स्मार्ट सिटी सीईओपदाबाबतची ही तक्रार स्मार्ट सिटी कंपनीकडेच पाठविण्यात येत असल्याचेही पोलिसांनी पत्रात नमूद केले. त्यामुळे हे प्रकरण आता महापौरांनी कोर्टात नेले. 

 
चोराने केलेल्या चोरीची तक्रार आपल्याशी संबंधित नसल्याचे सांगून पोलिसांनी ती चोराकडेच पाठविली. त्यामुळे आम्ही आता न्यायालयात न्याय मागणार आहे. सामान्य नागरिकांविरोधात तक्रार आल्यास तत्काळ गुन्हा नोंदविणारे पोलिस राजकीय दबावात असल्याची शंका आहे. मुंढे यांनी केलेल्या गैरकारभाराची चौकशी निःपक्षपणे व्हावी. 
संदीप जोशी, महापौर.