नागपूर : सोनेगाव परिसरात राहणाऱ्या एका महिलचा मृतदेह विहिरीत पाण्यावर तरंगताना आढळला. यामुळे खळबळ माजली. बघ्यांनी गर्दी केली होती. ही आत्महत्या की घातपात, अशी चर्चा सुरू होती.

ही घटना शुक्रवारी दुपारी 3.30 वाजताच्या सुमारास घडली. रेखा सुरेंद्र कश्‍यप (45, रा. स्वागत सोसायटी, एनआयटी गार्डन तलावाच्या बाजूला) असे मृत महिलेचे नाव आहे. पोलिसांनी दिलेल्या माहितीनुसार, रेखा कश्‍यप यांचे पती मजुरी करतात. तिला दोन मुले आहेत. त्यापैकी मुलीचे लग्न झाले आहे. दरम्यान, शुक्रवारी रेखा यांचा मृतदेह घराजवळील विहिरीच्या पाण्यात तरंगताना आढळून आला. ही घटना परिसरात माहिती होताच एकच खळबळ माजली. नागरिकांनी सोनेगाव पोलिसांना याची सूचना केली.

ठळक बातमी : मी माय शरीर विकीन म्हणजे विकीन, जे होईल ते होईल जीवाचं, वाचा वारांगनाची व्यथा...

पोलिसांनी तत्काळ घटनास्थळ गाठून मृतदेह बाहेर काढून उत्तरीय तपासणीसाठी रुग्णालयात हलविला. रेखा यांच्या मृत्यूचे नेमके कारण अद्याप स्पष्ट झाले नाही. हा घातपात आहे की रेखा यांनी विहिरीत उडी घेऊन आत्महत्या केली, याबाबत अद्याप खुलासा झाला नसून, पोलिस या दिशेने तपास करीत आहेत. या प्रकरणी मुलगा अजय सुरेंद्र कश्‍यप (30) यांनी दिलेल्या सूचनेवरून पोलिसांनी तूर्तास अकस्मात मृत्यूची नोंद करून पुढील तपास सुरू केला आहे.