Yavatmal News - जुगाराच्या खेळात झालेले कर्ज फेडण्यासाठी आपल्या साथीदारांना घेत दोघांचा खून करून दागिन्यांसह रोख रक्कमेवर हात मारला. सज्जनगड (तळेगाव भारी) येथील दुहेरी खून प्रकरणातील चार आरोपींकडून २६ हजार ३४० हजार रुपयांच्या रोख रक्कमेसह दागिने जप्त करण्यात आलेत. मात्र, मारेकऱ्यांनी चोरी केलेले दागिने बनावट निघाले.

लक्ष्मण चंपतराव शेंडे (वय ९०) व पुष्पा बापूराव होले (वय ७६) अशी मृतांची नावे आहेत. दोघांचाही सज्जनगड येथे गळा आवळून खून करण्यात आला होता. अवघ्या सहा तासांत स्थानिक गुन्हे शाखेच्या पथकाने या प्रकरणाचा उलगडा करीत चौघांना अटक केली.

न्यायालयाने मारेकऱ्यांना चार सप्टेंबरपर्यंत पोलिस कोठडी सुनावली आहे. लक्ष्मण शेंडे यांना महाराज म्हणून पंचक्रोशीत ओळखले जात होते. ते जडीबुटी देऊन दुर्धर आजार बरे करीत असल्याने त्यांच्याकडे नेहमीच गर्दी राहायची. जुगारामुळे आरोपी आशीष याच्यावर सहा ते सात लाख रुपयांचे कर्ज झाले होते.

महाराजांकडे नेहमी पैसा असतो. सोनेही असल्याची माहिती त्याला मिळाली. त्यामुळे कर्ज फेडण्यासाठी पैसे मिळतील, या उद्देशाने आपल्या साथीदारांच्या मदतीने महाराजासह वृद्धेचा खून केला. मारेकऱ्यांनी नेमका किती मुद्देमाल लांबविला, याची उत्सुकता सर्वांनाच होती.

पोलिस कोठडीत असलेल्या आरोपींनी कार्ली नाल्याजवळ लपवून ठेवलेली रोकड व दागिने काढून पोलिसांना दिले. पोलिसांनी रोकड मोजली असता २६ हजार ३४० रुपयांचा हिशोब लागला. जप्त करण्यात आलेल्या दागिन्यांची सराफाकडे नेऊन तपासणी करण्यात आली. सदर दागिने सोन्याचे नव्हे तर, बनावट असल्याचे आढळून आले. (Latest Marathi News)