चंद्रपूर : जिल्ह्यातील चांगल्या ठाण्याच्या यादीत अव्वल असलेले रामनगर पोलिस ठाणे सद्यस्थितीत रामभरोसे आहे. पोलिस निरीक्षक प्रकाश हाके मागील काही दिवसांपासून आजारी रजेवर गेले. त्यामुळे पोलिस निरीक्षक शेवाळे यांच्याकडे तात्पुरता प्रभार सोपविला आहे. सोबतच डीबी पथकातील सहाय्यक पोलिस निरीक्षक संदीप कापडे, संतोष दरेकर यांची बदली झाली. मात्र, त्या ठिकाणी नवीन अधिकारी नियुक्त करण्यात आले नाही. त्यामुळे पोलिस ठाणे आणि डीबी पथक कायमस्वरूपी अधिकाऱ्याच्या प्रतीक्षेत आहे. त्यामुळे गुन्ह्यांच्या तपासावर निश्‍चितच परिणाम झाला आहे.

हेही वाचा - अपहरणानंतर विवाहितेवर सामूहिक अत्याचार, फेसबुकवरून झाली होती ओळख

चंद्रपूर शहरात रामनगर आणि शहर, असे दोन पोलिस ठाणे आहे. रामनगर ठाण्याची जबाबदारी पोलिस निरीक्षक प्रकाश हाके यांच्याकडे आहे. मात्र, मागील काही दिवसांपासून हाके रजेवर गेले आहेत. त्यामुळे या ठाण्याचा तात्पुरता प्रभार पोलिस निरीक्षक शेवाळे यांच्याकडे सोपविण्यात आला आहे. चार-पाच दिवसांपूर्वी जिल्हा पोलिस अधीक्षक अरविंद साळवे यांनी जिल्ह्यांतर्गत पोलिस अधिकाऱ्यांच्या बदल्या केल्या. त्यात रामनगर डीबी पथकाचे सहाय्यक पोलिस निरीक्षक संदीप कापडे, संतोष दरेकर यांचा समावेश आहे. कापडे हे स्थानिक गुन्हे शाखेत, तर दरेकर हे राजुरा येथे गेले आहेत. 

हेही वाचा -Success story : सोशल मीडियावर स्क्रोलिंग करताना सापडला उद्योगाचा मार्ग, आता महिन्याला...

पोलिस निरीक्षकच नसल्याने डीबी पथकात नवीन अधिकारी नियुक्त करण्यात आलेले नाही. रामनगर पोलिस ठाण्याची हद्द मोठी असून, गुन्हेगारीच्या घटना येथे मोठ्या प्रमाणात घडत असतात. गुन्ह्यांचा छडा लावण्याचे मोठे आव्हान या ठाण्यातील पोलिस अधिकारी, कर्मचाऱ्यांसमोर असते. सोबतच मोहल्ला कमिट्यामार्फंत दारूविक्री सुरू आहे. या दारूविक्रीवर आळा घालण्याचीही जबाबदारी त्यांच्याच खांद्यावर असते. गुन्ह्याचे गांभीर्य ओळखून तपासाची जबाबदारी संबंधित अधिकाऱ्यांवर सोपविण्याचे काम पोलिस निरीक्षक करीत असतात. मात्र, कायमस्वरुपी पोलिस निरीक्षक नसल्याने याबाबतचा निर्णय घेण्यात विलंब होत आहे. त्यातूनच डीबी पथकात सहाय्यक पोलिस निरीक्षक दर्जाचे अधिकारी नियुक्त करण्यात आलेले नाही. परिणामी, नवीन गुन्ह्यांचा तपास करणे, दारूतस्करांच्या मुसक्‍या आवळणे यासर्व कामांवर मोठा परिणाम झाला असल्याची चर्चा पोलिस वर्तुळात आहे. 

हेही वाचा - आमदार होईल म्हटल्यावर लोकांनी टिंगलटवाळी केली अन् आता शिक्कामोर्तब होताच त्यांनाच आलं भरून

दारूविक्रेत्यांना मोकळे रान -
प्रत्येक प्रभागात अवैध दारूविक्रेते आहेत. या दारूविक्रेत्यांवर आळा घालण्याची जबाबदारी संबंधित पोलिस ठाण्यातील अधिकारी, डीबी पथकाची असते. मात्र, रामनगर पोलिस ठाण्यात कायमस्वरुपी पोलिस निरीक्षक नाही. तसेच डीबी पथकात सहाय्यक पोलिस निरीक्षक दर्जाचा अधिकारी नियुक्त नाही. दोन्ही महत्त्वाचे अधिकारी नसल्याने रामनगर ठाणे हद्दीतील दारूविक्रेत्यांसाठी आता मोकळे रान झाले आहे. यातूनच दोन दिवसांपूर्वी तुकुम परिसरात अवैधरीत्या दारूविक्री करणारा व्हिडिओ सोशल मीडियावर व्हायरल झाला होता. या व्हिडिओतून दारूची खुलेआम विक्री होत असल्याचे स्पष्ट दिसत आहे.