यवतमाळ : कोरोना युद्धात प्रत्येक जण आपली भूमिका बजावत आहे. कोरोनाचा अटकाव करण्यासाठी निधी उभापण्यासाठी अनेक हात पुढे सरसावले आहेत. अशात यवतमाळच्या एका नऊ वर्षीय चिमुकलीने सुद्धा कोरोना निधीसाठी आपल्या खाऊचे पैसे दिले आहेत. तिच्या या कृतीमुळे भावूक झालेल्या पोलिस अधिकाऱ्यांनी तिच्या घरी जाऊन वाढदिवस साजरा केला.

कुरेशीपुरा, कळंब चौक, यवतमाळ येथील नऊ वर्षीय झरीन समीर शेख या मुलीचा पोलिस दलातर्फे वाढदिवस साजरा करण्यात आला. विशेष म्हणजे, ही छोटीशी मुलगी किडनीच्या आजाराने ग्रस्त आहे. अशा या परिस्थितीतसुद्धा आपल्या वाढदिवशी या चिमुकलीने आपल्या पिगीबॅंकमध्ये जमा झालेली रक्कम कोवीड-19 सारख्या आजाराशी सामना करण्याकरिता मदत म्हणून स्थानिक गुन्हे शाखेचे पोलिस निरीक्षक प्रदिप शिरस्कर यांना सुपूर्द केली.

- संपूर्ण हॉटेल होते रिकामे, पण दोन खोल्यांमध्ये सुरू होता हा प्रकार
 

खाऊची रक्कम दिली कोरोना निधीला मदत
या अशा परिस्थितीत या चिमुकलीने केलेली मदत फारच मोलाची आहे. त्याद्वारे तिने
" लहान जरी आम्ही असलो,
तरी मोठे अमुचे मन..
कोरोनाचा सामना करुया,
मिळूनी आपण सारे जण....
असा सुंदर संदेश दिला आहे. लॉकडाउनमुळे कुणाला घराबाहेर जाता येत नाही. तसे आवाहन जनतेला करण्यात येत आहे. अशाही स्थितीत लोक मदत करीत आहेत, याचे कौतुक करावे तेवढे कमीच आहे.