अमरावती : ग्रामीण भागात कोरोनाविरोधातील लढ्याचे रणशिंग फुंकणाऱ्या जिल्ह्याचे मिनी मंत्रालय असलेल्या जिल्हा परिषदेतच स्वच्छतेचे पार तीनतेरा वाजले आहेत. विशेष म्हणजे संपूर्ण जिल्ह्याला हात धुण्याचे आवाहन करीत फिरणाऱ्या प्रशासनाचे पितळ  मुख्यालयातच उघडे पडले आहे.

Video : शेतक-यांच्या पांढ-या सोन्याला मिळतोय मातीमोल भाव; एका शेतक-याने व्यथा मांडली गीतातून...

सध्या कोरोनाचा प्रादुर्भाव वाढत चालला असून खबरदारीचा उपाय म्हणून शासनाने बाहेरून येणाऱ्या अभ्यागत तसेच कर्मचाऱ्यांच्या सुरक्षेसाठी कार्यालयाच्या बाहेर पाणी, हॅण्डवॉश किंवा साबणाची व्यवस्था करण्याचे निर्देश दिले. या निर्देशांचे थातूरमातूर पालन करणाऱ्या जिल्हा परिषदेने सुरुवातीला काही दिवस पाण्याचे ड्रम तसेच साबणाची व्यवस्था केली. मात्र 8 ते 10 दिवसांतच हा उत्साह मावळला. आजच्या स्थितीत चित्र असे आहे की काही ठिकाणी नुसतेच पाण्याचे कोरडे ड्रम उभे आहेत. काहींच्या तोट्या तुटल्या, कुठे पाणी आहे मात्र साबण नाही, विशेष म्हणजे सभापतींच्या कक्षासमोर केवळ हात धुण्याच्या सूचना आहेत, तिथे काहीच साहित्य नाही. असे चित्र पाणीपुरवठा विभाग, सामान्य प्रशासन, अर्थ विभाग, समाजकल्याण विभाग, सिंचन विभाग, पाणी व स्वच्छता विभाग तसेच पदाधिकाऱ्यांच्या कक्षासमोर दिसून येते. कोरोनाचा प्रादुर्भाव वाढल्यानंतर ग्रामीण भागातील आरोग्य व्यवस्था सांभाळण्याची जबाबदारी जिल्हा परिषदेकडे आहे. असे असले तरी प्रत्यक्षात मात्र जिल्हा परिषदेच्या मुख्यालयातच कोरोनाविरोधी लढ्यातील महत्त्वाचा घटक असलेल्या स्वच्छतेचा पार धिंगाणा उडाला आहे.

काय आहे शासनादेश?

प्रत्येक कार्यालयासमोर हात धुण्यासाठी स्वच्छ पाणी, हॅण्डवॉश अथवा साबण, एखादा टॉवेल ठेवणे गरजेचे आहे. याशिवाय बाहेरून येणाऱ्यांकरिता सोशल डिस्टन्सिंगसाठी वर्तुळ आखण्यात यावे.