नंदोरी (जि. वर्धा) : यंदा देशासह राज्यात कोरोना विषाणूने थैमान घातले आहे. परिणामी, व्यापार क्षेत्रासह शैक्षणिक क्षेत्रालाही याचा फटका बसला आहे. या पार्श्वभूमीवर 2020-21 या शैक्षणिक वर्षात राज्यातील शैक्षणिक संस्थांनी कोणतीही शुल्क वाढ करू नये, असा आदेश राज्याच्या शिक्षण विभागाने काढला आहे. सर्व बोर्डाच्या, सर्व माध्यमांच्या पूर्वप्राथमिक ते इयत्ता बारावीपर्यंतच्या विद्यार्थ्यांना याचा लाभ मिळणार आहे. या निर्णयाने राज्यातील लाखो पालकांना दिलासा मिळाला आहे.
राज्यात मार्चपासून कोरोनाचा प्रसार वाढल्यामुळे खबरदारीचा उपाय म्हणून शाळा, महाविद्यालये बंद ठेवण्यात आली आहेत. परीक्षाही रद्द करण्यात आल्या आहेत. अनेकांचा रोजगार हिरावल्याने पालकांची आर्थिक परिस्थिती खालावलेली आहे. दरम्यान, शाळांनी विद्यार्थ्यांकडून फी वसुलीचा तगादा लावला होता. पुढील शैक्षणिक वर्षात शैक्षणिक शुल्कवाढ करण्याबाबतच्या हालचालीही सुरू केल्या होत्या. याला आता चाप बसणार आहे.
राज्यात लॉकडाउन सुरू असताना काही शैक्षणिक संस्था, शाळा या विद्यार्थी-पालकांना फी भरण्याची सक्ती करीत असल्याच्या तक्रारी शासनाकडे प्राप्त झाल्या होत्या. त्यावर शाळेची चालू वर्षाची व आगामी वर्षाची फी जमा करण्यासाठी सक्ती करू नये, लॉकडाउनचा कालावधी संपल्यानंतर फी जमा करावी अशा सूचना देण्यात आल्या आहेत.
पालकांच्या सोयीच्या दृष्टीने 2019 -20 व 20 -21 या शैक्षणिक वर्षातील देय व शिल्लक फी ही वार्षिक किंवा एकदाच न घेता मासिक जमा करण्याचा पर्याय द्यावा, गैरसोय टाळण्यासाठी पालकांना ऑनलाइन फी भरण्याचा पर्याय द्यावा, असे आदेश शालेय शिक्षण विभागाच्या अपर मुख्य सचिव वंदना कृष्णा यांनी नुकतेच दिले आहेत. आगामी शैक्षणिक वर्षात काही शैक्षणिक सुविधांचा वापर कमी करावा, त्याबाबतचा खर्च कमी होत असल्यास पालकांच्या कार्यकारी समितीमध्ये ठराव घेऊन फी कमी करावी, असेही आदेशात नमूद आहे.
सविस्तर वाचा - शू...आमच्या गावात तुम्हाला प्रवेश नाही बरं का!
आम्ही शासनासोबत
आमच्या शाळेसारख्या अनेक शाळा राज्यात आहेत, ज्या उत्तम शिक्षण अत्यल्प फीमध्ये देत आहेत. लॉकडाउनमुळे सर्व व्यवहार ठप्प आहेत. सरकारने वेगवेगळे आदेश काढताना कायम विनाअनुदानित व स्वयंअर्थसाहाय्य शाळा सुरळीतपणे सुरू राहतील, हे निश्चित करावे. 25 टक्के आरटीई प्रतिपूर्ती थकबाकी वेळीच द्यावी. कोविड-19 मुळे निर्माण झालेल्या आणीबाणीच्या परिस्थितीत आम्ही शासनासोबत आहोत.
मिलिंद दीक्षित, समन्वयक,
आगरकर विद्या भवन, हिंगणघाट
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.