पांढरी (जि. गोंदिया) : सीतेपार ते किसनपूर मार्गावरील खचलेल्या पुलाची 18 महिन्यांपासून दुरुस्ती करण्यात आली नाही. त्यामुळे येथील नागरिकांना वाहतुकीसाठी दुसरा पर्याय नसल्याने जीव मुठीत घेऊन येथूनच प्रवास करावा लागत आहे. परिणामी, कधीही मोठा अपघात घडण्याची शक्‍यता नाकारता येत नाही. दरम्यान, जिल्हा परिषदेच्या सार्वजनिक बांधकाम विभागाने लक्ष देऊन या पुलाची दुरुस्ती करावी, अशी मागणी होत आहे. 

हेही वाचा - धक्कादायक! राज्यातील १० हजारांपेक्षा अधिक शिक्षक होणार 'अतिरिक्त',...

मागील वर्षीच्या पावसाळ्यात या परिसरात पावसाने जोरदार हजेरी लावली होती. पुराने रौद्ररूप धारण केले होते. पुलावरून कित्येक दिवस सतत पाणी वाहत होते. त्यामुळे पुराच्या वाहत्या पाण्याने पुलाचा खालचा व बाजूचा बराचसा भाग पाण्याच्या प्रवाहात वाहून गेला. या घटनेची माहिती तालुकास्तरापासून जिल्हास्तरापर्यंत वाऱ्यासारखी पसरली होती. लोकप्रतिनिधी, मंत्री व विभागाच्या अधिकारी, कर्मचाऱ्यांनी घटनास्थळ गाठले होते. तडकाफडकी पूल वाहतुकीसाठी बंद करण्यात आले होते. पुलावर वाहतुकीसाठी 'बंद'चा फलकदेखील लावला होता. तसेच विभागाच्या अधिकाऱ्यांनी लवकरात लवकर पूल दुरुस्ती करण्यात येईल, असे आश्‍वासन दिले होते. या आश्‍वासनाला 18 महिन्यांचा कालावधी पूर्ण झाला. मात्र, सीतेपार किसनपूर मार्गावरील पुलाची अद्याप दुरुस्ती करण्यात आली नाही.

हेही वाचा - ऐकावे ते नवलच! खोदकाम बोरवेलचे अन् पाणी निघाले विहिरीतून

स्थानिक प्रशासनाकडून 18 महिन्यांपूर्वीच यासंबंधी कागदी कारवाई पूर्ण करून तसा प्रस्ताव जिल्हा परिषदेच्या सार्वजनिक बांधकाम विभागाच्या सुपूर्द करण्यात आला. परंतु, कामचुकारपणामुळे अजूनही पूल दुरुस्ती होऊ शकली नाही.  

हेही वाचा - नागपूरवरून वर्धेत गेल्यानंतर युवकाने घेतले विष; नंतर...

सीतेपार ही गटग्रामपंचायत असून, किसनपूर व शिकारीटोला ही गावे समाविष्ट आहेत. 2011 च्या जनगणनेनुसार 1121 इतकी लोकसंख्या आहे. हा पूल तीन गावांना जोडणारा एकमात्र असून, शेतकरी, विद्यार्थ्यांपासून तर नागरिकांसाठी अतिमहत्त्वाचा आहे. दरम्यान, जिल्हा परिषदेच्या सार्वजनिक बांधकाम विभागाने या पुलाची त्वरित दुरुस्ती करावी, अशी मागणी होत आहे. 

हेही वाचा - विद्यार्थ्यांचं भविष्य अंधारात : केंद्राने थकविला निधी...

साहेब, वाट कसली पाहता? -
18 महिन्यांपासून पुलाची दुरुस्ती करण्यास सार्वजनिक बांधकाम विभाग अपयशी ठरला आहे. 12 लाख रुपयांचा निधी मंजूर असूनसुद्धा एखादा अपघात किंवा घटना घडल्यावर साहेबांना जाग येईल काय? पूल दुरुस्तीसाठी कसली वाट बघताय, असा संतप्त सवाल नागरिकांनी उपस्थित केला आहे.