वर्धा : येथील रामनगर परिसरात रात्री पुन्हा एका घरातून देशीकट्टा जप्त करण्यात आला. या प्रकरणी एकाला अटक करण्यात आली आहे. अटकेतील आरोपीचे नाव शुभम लालसिंग ठाकूर रा. रामनगर असे असल्याची माहिती पोलिसांनी दिली. त्याने हा देशीकट्टा कुठून आणि कशासाठी आणला याचा तपास सुरू असल्याची माहिती पोलिसांकडून देण्यात आली आहे.

सविस्तर वाचा - घरात अचानक जाणवू लागली प्रचंड उष्णता; कारण कळताच कुटुंबाने पहिल्या माळ्यावरून घेतल्या उड्‌या

रामनगर परिसरात शुभम ठाकूर याच्या घरी देशीकट्टा असल्याची माहिती रामनगर पोलिसांना मिळाली. पोलिसांनी लगेच घटनास्थळ गाठून ठाकूर यांच्या घराची पाहणी केली असता त्याच्या घराच्या सज्जावर देशी कट्टा मिळून आला. यावरून त्याला अटक करण्यात आली असून सदर बंदूक जप्त करण्यात आली आहे. 

ही कारवाई उपविभागीय पोलिस अधिकारी पीयूष जगताप यांच्या मार्गदर्शनात ठाणेदार धनाजी जळक यांच्या मार्गदर्शनात पोलिस उपनिरीक्षक मेघाली गावंडे, गणेश राऊत, संदीप खरात, राहुल दुधकोहळे, लोभेश गाढवे यांनी केली.

दीड महिन्यात जिल्ह्यात सापडल्या पाच बंदुका

जिल्ह्यात बंदूक सापडण्याच्या घटना वाढत असल्याचे दिसून आले आहे. या दीड महिन्याच्या काळात पाच बंदुका मिळून आल्या आहेत. यात रामनगर येथे एक मिळून आली तर पुलगाव येथे दोन बंदुका मिळून आल्या. तर याच महिन्याच्या प्रारंभी हिंगदनगर येथे एक बंदूक जप्त करण्यात आली आहे. 

क्लिक करा - रस्त्यावरील झाडांच्या खोडाला का असतो पांढरा-लाल रंग? जाणून घ्या यामागचं महत्वाचं कारण

गत महिन्याच्या शेवट सेलू तालुक्‍यातील हिंगणी परिसरातील जंगलात एक बंदूक बेवारास स्थितीत मिळून आली होती. जिल्ह्यात एका वेळी एवढ्या बंदुका मिळून आल्याने भीतीचे वातावरण निर्माण झाले आहे. या संदर्भात पोलिस प्रशासनाने लक्ष देत कारवाई करण्याची मागणी सर्वसामान्यांकडून होत आहे.

संपादन - अथर्व महांकाळ