गडचिरोली : तालुक्‍यातील अलोणी-बोदली दरम्यान असलेल्या नाल्यालगत आठ ठिकाणी टाकलेला तब्बल 1 लाख रुपये किंमतीचा मोहसडवा व साहित्य गडचिरोली पोलिस व मुक्तिपथने संयुक्तरीत्या नष्ट केला आहे. ऍक्‍शन प्लॅननुसार गावातील मुजोर दारूविक्रेत्यांविरोधात ही कारवाई करण्यात आली आहे.   

हेही वाचा - रणजित सफेलकरची पोलिसांनी काढली धिंड; अनवाणी पायाने, बरमुड्यावरच नेले न्यायालयात

अलोणी या गावात दारूचा महापूर आहे. अलोणीत 30 ते 40 दारूविक्रेते सक्रिय आहेत. या गावाच्या माध्यमातून तालुक्‍यातील बोदली, जेप्रा, जेप्रा चक, राजगाटा माल, राजगटा चक, उसेगाव व जिल्ह्याचे ठिकाण असलेल्या गडचिरोली शहरातसुद्धा दारू  पुरविली जाते. त्यामुळे परिसरातील अनेक गावे त्रस्त झाली आहेत. झगडे-भांडणांचे प्रमाण अधिक झाले आहेत. याबाबत गडचिरोली पोलिस ठाण्यात वारंवार तक्रारी प्राप्त होत होत्या. गडचिरोली पोलिस व मुक्तिपथ तालुका चमूने संयुक्तरीत्या अलोणी येथील जंगल परिसरात अहिंसक कृती करण्याचे ठरविले. त्यानुसार जंगल परिसरात शोधमोहीम राबवत असताना अलोणी- बोदली दरम्यान असलेल्या नाल्यालगत आठ ठिकाणी 30 ड्रममध्ये मोहसडवा टाकला असल्याचे निदर्शनास आले. असा एकूण 1 लाख रुपये किमतीचा मोहसडवा व साहित्य नष्ट करण्यात आले. गडचिरोलीचे पोलिस अधीक्षक अंकित गोयल यांच्या आदेशाने ऍक्‍शन प्लॅननुसार तालुक्‍यातील अवैध दारूविक्रेत्यांविरोधात मोहीम सुरू आहे. मुजोर गावातील दारूविक्रेत्यांविरोधात गडचिरोली पोलिसांनी केलेल्या कारवाईमुळे तालुक्‍यातील दारूविक्रेते धास्तावले आहेत. ही कारवाई गडचिरोलीचे ठाणेदार दामदेव मंडलवार यांच्या मार्गदर्शनात हवालदार रमेश उसेंडी, यशवंत मलगाम, मुक्तिपथ तालुका संघटक अमोल वाकूडकर, तालुका उपसंघटक रेवनाथ मेश्राम यांनी केली.    

हेही वाचा - खरेदी, विक्रीच्या व्यवहारात महिलांना १ टक्का सूट;...

उन्हाळ्यात वाढते प्रमाण -
जिल्ह्यात मार्च महिन्यापासून मोहवृक्षांना बहर येतो. मोहफुले गळायला लागतात. त्यामुळे मोठ्या प्रमाणात मोहफुलांचे संकलन होते. अशावेळेस मोहसडवे टाकण्याचे प्रमाणही वाढते. या काळात नदी, नाल्यांच्या काठावर, जंगलात पाणथळ जागेच्या ठिकाणी किंवा दाट जंगलात, अशा अनेक ठिकाणी मोहाचे सडवे टाकण्यात येतात. त्यामुळे पोलिसांनी या अनुषंगानेही सडव्यांचा शोध घेण्याची मागणी करण्यात येत आहे.