गांधीग्राम (जि. अकोला) :  राष्ट्रपिता महात्मा गांधी यांच्या अस्थीकलशाने पावन झालेल्या गांधीग्राम येथे बेसन भाकरीची परंपरा ७२ वर्षापासून सुरू असून, यंदाही राष्ट्रपिता महात्मा गांधी यांच्या पावन स्मृतीस अभिवादन करण्यासाठी येथील महात्मा गांधी विद्यालय व कनिष्ठ महाविद्यालयाच्या वतीने बुधवारी (ता.12) ला येथे विविध कार्यक्रमांचे आयोजन करण्यात आले आहे.

हे वाचा - डॉन आंबेकरच्या फेक करंसीचे अकोला कनेक्शन
पूर्णा नदीत केल्या होत्या अस्थी विसर्जीत
(12 फेब्रुवारी 1948) पासून हा कार्यक्रम नित्य नियमित करण्यात येतो, महात्मा गांधी यांची (ता.30) जानेवारी रोजी हत्या झाली होती. या घटनेनंतर (ता.12 फेब्रुवारी 1948) रोजी महात्मा गांधी यांच्या अस्थि गांधीग्राम येथील पूर्णा नदीमध्ये विसर्जित करण्यात आल्या होत्या. त्या दिवशी पाहुणे मंडळीनी सोबत बसून बेसन भाकरीचा आस्वाद घेतला होता. त्या दिवशीपासून येथील गांधी विद्यालयात नित्य नियमाने हा कार्यक्रम पाळला जातो. महात्मा गांधी यांची हत्या झाल्यानंतर ठिकठिकाणी त्यांच्या अस्थी विसर्जन करण्यात आल्या होत्या. अकोला येथील स्वातंत्र्य सेनानी ब्रिजलाल बियाणी यांनी महात्मा गांधी यांच्या अस्थि येथील पूर्णा नदीत विसर्जित करण्यासाठी आणल्या होत्या. 

क्लिक करा - मतदानाला फाटा; विषय समित्या बिनविरोधात
दरवर्षी याच तारखेला होता कार्यक्रम
गावातील ज्येष्ठ मंडळींसह पूर्णा नदी काठावर गंगा पूजन करून अस्थिचे विसर्जन करण्यात आले होते. त्यानंतर बाहेरगाववरून आलेल्या व गावातील मंडळींनी एकत्र बसून बेसन व ज्वारीच्या भाकरीचे जेवण केले होते. त्यामुळे आजही ही परंपरा अविरत पाळण्यात येते. महात्मा गांधी यांच्या कार्याची आठवण राहावी म्हणून सर्व मंडळींनी गांधीजींच्या नावावर महात्मा गांधी मेमोरिअल ट्रस्ट स्थापन केले. महात्मा गांधी विद्यालय व कनिष्ठ महाविद्यालय सुरू करण्यात आले. त्याचबरोबर महात्मा गांधी यांचे विशाल स्मारक बांधण्यात आले. यासाठी अनेकांनी सहकार्य केले. म्हणून दरवर्षी (ता.12) फेब्रुवारीला शाळेमध्ये शिक्षक, विद्यार्थी, पालक व स्वातंत्र सैनिक एकत्र येऊन बेसन भाकरीचे जेवण करतात.

विविध कार्यक्रमांचे आयोजन
सकाळी गांधीजींच्या स्मारकाचे पूजन व प्रार्थना झाल्यानंतर ग्रामसफाई, 11 वाजता स्वातंत्र सेनानी यांचे स्वागत, 12 वाजता गांधींजीच्या जीवनावर भाषणाचा व गायनाचा कार्यक्रम, दुपारी एक वाजता झुणका भाकर (बेसन भाकर) सहभोजन कार्यक्रम, दुपारी चार वाजता पवित्र पूर्णा नदीवर अस्थी विसर्जन व गंगा पूजन, प्रार्थना, गीताई पठण, पाच वाजता कार्यक्रमाची सांगता करण्यात आली.