यवतमाळ : महागाव (mahagaon yavatmal) तालुक्यातील अमडापूर प्रकल्पात (amdapur project yavatmal) पुनवर्सन मोबदल्याच्या प्रतिक्षेत आहे. या मागणीसाठी सोमवारपासून स्थानिक आझाद मैदान येथे उपोषण सुरू आहे. मोबदला देण्याबाबत निर्णय न झाल्याने गुरुवारी (ता.12) कैलास दशरथ डुकरे यांनी जिल्हाधिकारी कार्यालयात अंगावर डिझेल ओतून आत्मदहनाचा प्रयत्न केला.

उमरखेड तालुक्यातील अमडापूर येथे 2005 मध्ये अमडापूर धरण बांधण्यात आले. 1994 पासून सुरुवात झालेल्या धरणाचे काम 2005 मध्ये पूर्ण झाले. या प्रकल्पात कुरळी येथील नागरिकांची घरे व शेतजमीन संपादीत करण्यात आली. त्यांना शेतीचा मोबदला अत्यल्प मिळाला. कुरळी येथील 340 कुटुंबांच्या पुनवर्सनासाठी महागाव येथे 12 हेक्टर जमीन उपलब्ध करून दिली होती. परंतु, 24 हेक्टर जमिनीची गरज होती. त्यामुळे पुनवर्सवनाचा प्रस्ताव बारगळला. पुनवर्सनासाठी खर्च भरपूर येणार असल्याने शासनाने स्वेच्छा पुनर्वसनाचा प्रस्ताव लघु पाटबंधारे विभाग पुसद येथील अधिकार्‍यांनी 2019 मध्ये प्रकल्पग्रस्तांसमोर ठेवला. प्रकल्पाग्रस्तांनी स्वेच्छा पुनवर्सनासाठी मान्यता दिली. परंतु, ठराविक कालावधीत पुनर्वसन करण्यात आले नाही. पुनवर्सन न केल्यामुळे कालपासून पुन्हा अमडापूर प्रकल्पातील कुरळी येथील नागरिकांना उपोषणास बसावे लागले आहे. यातील उपोषणकर्ते शेतकरी कैलास दशरथ डुकरे यांनी जिल्हाधिकारी कार्यालयात साडेअकराच्या सुमारास अंगावर डिझेल ओतून आत्मदहनाचा प्रयत्न केला. सोबत सहकारी तसेच पोलिस असल्याने मोठा अनर्थ ठळला.