यवतमाळ : खरीप हंगामात समाधानकारक पाऊस झाला आहे. प्रकल्पातही मोठ्या प्रमाणात जलसाठा आहे. त्यामुळे यंदा रब्बीचे पेरणी क्षेत्र वाढण्याचा अंदाज आहे. गेल्या वर्षी एक लाख ६९ हजार हेक्‍टरवर पेरणी झाली होती. यंदा दोन लाख हेक्‍टरवर पेरणीचा अंदाज आहे.

पावसाने सुरुवातीला उघडझाप घेतली. त्यामुळे पाऊस होणार की नाही, अशी भीती शेतकऱ्यांना होती. मात्र, यंदा दमदार पाऊस झाला. सरासरीच्या तुलनेत चांगला पाऊस झाल्याने जिल्ह्यातील प्रकल्प ओव्हरफ्लो झाले आहेत. जमिनीतही मोठ्या प्रमाणात पाणीसाठा आहे. पावसामुळे सोयाबीन तर काही भागात कपाशीला फटका बसला आहे. त्यामुळे खरिपातील नुकसान रब्बीत भरून काढण्याचे नियोजन शेतकऱ्यांचे आहे.

हेही वाचा - एअर हॉस्टेसवर प्रियकराने केला बलात्कार

यंदा जिल्ह्यात चांगला पाऊस झाल्याने शेतकऱ्यांच्या आशा पल्लवित झाल्या आहेत. जिल्ह्यात रब्बीचे सर्वसाधारण क्षेत्र एक लाख ३२ हजार ३१६ हेक्‍टर आहे. गेल्या वर्षी एक लाख ६९ हजार ६४३ हेक्‍टर क्षेत्रावर रब्बीच्या पेरणी झाली होती. यंदा यात वाढ होण्याचा अंदाज कृषी विभागाने वर्तवला आहे. यामध्ये मुख्य पीक असलेल्या ज्वारी, गहू, हरभरा या पिकांच्या मोठ्या क्षेत्रावर पेरण्या होणार आहे.

अडीच हजार हेक्‍टरवर रब्बी ज्वारी, ६० हजार हेक्‍टरवर गहू तर एक लाख २९ हजार हेक्‍टरवर हरभरा पिकांचा पेरा होण्याची शक्‍यता आहे. याशिवाय, करडई, जवस, तीळ, सूर्यफुल, सहा हजार हेक्‍टरवर भाजीपाला व इतर पिकांची पेरणी होण्याचा अंदाज आहे. बियाणे कमी पडू नये यासाठी तजवीज करण्यात आली आहे. रब्बीसाठी एक लाख ५४ हजार ६०० क्विंटल बियाण्याचे नियोजन करण्यात आले आहे. ५६ हजार क्विंटल सार्वजनिक तर ९८ हजार क्विंटल बियाणे खासगीकडून नियोजन केले आहे.

सविस्तर वाचा - मुख्यमंत्री उद्धव ठाकरेंविरोधात पोलिसांत तक्रार; जनतेची फसवणूक केल्याचा आरोप

संपादन - नीलेश डाखोरे