नागपूर - भाजपच्या सांगण्यावरून शिंदे सेनेला रामटेक आणि यवतमाळ लोकसभा मतदारसंघात उमेदवार बदलणे चांगलेच भोवले आहे. येथील दोन्ही उमेदवार पराभूत झाले.

शिंदे सेनेचे खासदार कृपाल तुमाने यांनी सलग दोनवेळा रामटेक जिंकून दिले होते. यवतमाळ मतदारसंघात खासदार भावना गवळी सातत्याने निवडून येत होत्या. मुख्यमंत्री शिंदे बाहेर पडल्यानंतर तुमाने आणि गवळी दोन्ही खासदार त्यांच्यासोबत गेले. महायुतीमध्ये त्यांची उमेदवारी पक्की मानली जात होती.

मात्र, भाजपने निवडणुकीपूर्वी केलेल्या सर्वेक्षणात हे दोन्ही उमेदवार पराभूत होणार असल्याचे दाखवण्यात आले. अहवाल दिला होता. त्यामुळे भाजपने शिंदे सेनेवर दबाव टाकून उमेदवार बदलण्यास भाग पडले. त्यामुळे तुमाने आणि गवळी यांचे तिकीट कापण्यात आले. याची मोठी किंमत महायुतीला चुकवावी लागली.

यवतमाळमध्ये खा. गवळी यांना डावलून शिंदे सेनेने नांदेड येथून उमेदवार आयात केला. राजश्री पाटील यांना उमेदवारी दिली. त्या मूळच्या यवतमाळच्या आहेत. त्यांचे पती हिंगोलीचे खासदार होते.

त्यामुळे भावना गवळी नाराज होत्या. उद्धव बाळासाहेब ठाकरे सेनेने संजय देशमुख यांना उमेदवारी देऊन आपला मतदारसंघ शाबूत राखला. रामटेकमध्ये भाजपचे प्रदेशाध्यक्ष चंद्रशेखर बावनकुळे यांच्या सांगण्यावरून तुमाने यांचा पत्ता कट करण्यात आला. भाजपच्या वाटेवर असलेल्या काँग्रेसचे आमदार राजू पारवे यांना शिवसेनेत धाडून त्यांना उमेदवार केले; मात्र याचा काही फायदा महायुतीला झाला नाही.