समुद्रपूर(जि. वर्धा) : तालुक्यातील रेणकापूर येथे पाण्याच्या टाक्यात बुडून मृत्यू झालेल्या चिमुकल्याचा मृतदेह शवविच्छेदनाकरिता येथील ग्रामीण रुग्णालयाच्या शवविच्छेदन गृहात ठेवण्यात आला होता. हा मृतदेह सकाळी बाहेर काढला असता तो उंदरांनी कुडतडल्याचे दिसून आले. ही धक्कादायक घटना शनिवारी (ता. १३) सकाळी उघडकीस आली.
 
हा प्रकार चिमुकल्याच्या कुटुंबीयांना कळताच त्यांनी रुग्णालय प्रशासनाविरोधात रोष व्यक्त केला. गावकऱ्यांनी व्यक्त केलेल्या रोषामुळे येथे बराच काळ तणावाचे वातावरण निर्माण झाले होते. याची माहिती तहसीलदार राजू रणवीर यांना कळताच त्यांनी रुग्णालय गाठत या प्रकरणाची चौकशी करीत दोषींवर कारवाई करण्याचे आश्वासन दिले. या आश्वासनावर गावकèयांनी नमते घेतले. यानंतर शवविच्छेदनाच्या प्रक्रियेला प्रारंभ झाला.

रेणकापूर येथे शुक्रवारी (ता. १२) सायंकाळी घराच्या अंगणात अंगणात खेळत असलेल्या अडीच वर्षीय प्रथम ऊर्फ गणेश राजू निखाडे हा बाल पाण्याच्या टाक्यात पडला. परिसरातील नागरिकांनी त्याला काढून ग्रामीण रुग्णालयात नेले. येथे डॉ. फरहीन यांनी त्याला मृत घोषित केले होते. याच कुटुंबीयांनी मृतदेह देण्याची मागणी केली. परंतु, रुग्णालयाकडून शवविच्छेदन केल्या शिवाय मृतदेह देण्यास नकार देण्यात आला. रात्रभर बालकाचे शव शवविच्छेददगृहात ठेवण्यात आले.

अवश्य वाचा- धंद्यावर बसवण्याची धमकी देणारी 'लुटेरी दुल्हन' प्रीती दास पोलिसांच्या जाळ्यात

सकाळी शवविच्छेदन करण्यासाठी जेव्हा बालकाचे शव काढले तेंव्हा ते उंदराने कुरतडल्याचे दिसून आले. यामृळे मृत बालकाच्या कुटुंबीयांमध्ये रोष निर्माण झाला. यावेळी रुग्णालयात तणावाचे वातावरण निर्माण झाले होते. घटनेचे गांभीर्य लक्षात घेऊन तहसीलदार राजू रणवीर यांच्यासह पोलिसांनी रुग्णालय गाठले. या घटनेत दोषी डॉक्टरांवर कारवाई करण्याची मागणी मृतक बालकाच्या कुटुंबीयांनी केली आहे.
 

समुद्रपूर ग्रामीण रुग्णालयांतर्गत येत असलेल्या रेणकापूर येथील बालकाचा पाण्यात बुडून मृत्यू झाल्याची माहिती मिळाली. तसेच या बालकाचा मृतदेह शवविच्छेदन गृहात ठेवण्यात आला असता उंदरांनी तो कुरतडल्याचीही माहिती मिळाली. या प्रकरणासंदर्भात एक चौकशी समिती गठित करण्यात आली आहे. या समितीचा अहवाल प्राप्त होताच दोषींवर कठोर कारवाई कारवाई करण्यात येईल.
- डॉ. पुरुषोत्तम मडावी, जिल्हा शल्य चिकित्सक, वर्धा