अमरावती : संस्थात्मक विलगीकरणात ठेवलेल्या कुटुंबांची घरे सध्या कुलुपबंद आहेत. चोरांसाठी ही पर्वणीच आहे. कारण लॉकडाऊनमुळे अनेकजण चोवीस तास घरातच असल्याने चोरांची घरफोडी करण्याची संधी कमी झाली आहे. त्यामुळे एका चोराने नेमके कोरोनाबाधिताचे घरच चोरीसाठी निवडले आणि तो रंगेहात पकडला गेला.
कुटुंबातील एका महिलेचा कोरोनामुळे मृत्यू झाला. त्यानंतर कुटुंबातील दोघे कोरोना पॉझिटिव्ह आढळले. त्यामुळे इतर सदस्यांना संस्थात्मक विलगीकरणात पाठविण्यात आले. त्याच बंद घरात चोरी करताना एका व्यक्तीला पकडण्यात आले.
सूरज दर्शनाल (वय 29 रा. चपराशीपुरा) असे पकडलेल्या व्यक्तीचे नाव आहे. नाजीम शहा वल्द करीम शहा (वय 30 रा. वृंदावन कॉलनी) यांनी फ्रेजरपुरा ठाण्यात तक्रार नोंदविली. पोलिसांनी चोरीचा प्रयत्न केल्याप्रकरणी गुन्हा दाखल करून दर्शनाल यास पकडले. सदर घर काही दिवसांपासून बंद असल्याची चाचपणी त्याने आधीच करून घेतली. रविवारी (ता.14 ) मध्यरात्रीनंतर एकच्या सुमारास सूरज हा त्या बंद घरात घुसला. त्याचे कपाटांसह इतर पेट्याही हुसकल्या. घरमालकास शेजा-यांनी घरात चोर घुसल्याची माहिती दिली. चोरट्याने दाराचे कुलूप तोडून आतून दार बंद करून घेतले होते. नागरिकांनी पोलिसांना कळविताच ताफा घटनास्थळी पोचला. पोलिसांनी घरात घुसलेल्या सूरज दर्शनास यास बाहेर निघण्यास सांगितल्यावर दुपट्ट्याने चेहरा झाकून तो बाहेर येताच त्याला अटक केली. यापूर्वी शहरातील एका कोरोनाबाधित व्यक्तीचे घर फोडून चोरट्यांनी ऐवज लंपास केला होता.

सविस्तर वाचा - कोरोना ब्रेकिंग : या शहराने पार केला हजाराचा पल्ला, गुणाकार पद्धतीने होतेय वाढ

लग्नासाठी ठेवलेले पैसे बचावले
संबंधित व्यक्तीच्या लहान भावाचे लग्न असल्यामुळे आवश्‍यक असलेले पैसे एका लोखंडी पेटीत ठेवले होते. ते पैसे पोलिस आल्यामुळे बचावले.