राजुरा (जि. चंद्रपूर) : मध्य चांदा वन विभागाच्या राजुरा वनपरिक्षेत्राच्या विहीरगाव उपक्षेत्र तथा नियतक्षेत्र कक्ष क्रमांक १७२ मध्ये नर वाघ मृतावस्थेत आढळून (found dead tiger) आल्याने वन विभागात एकच खळबळ उडाली आहे. वाघाचा मृत्यू कशाने झाला हे शवविच्छेदन अहवाल आल्यानंतरच स्पष्ट होईल. सध्या मोका पंचनामा व पुढील चौकशी सुरू असल्याची माहिती मध्य चांदा वन विभागाचे उपवनसंरक्षक अरविंद मुंढे यांनी दिली. (Rotten-carcass-of-a-tiger-found-in-Vihirgaon-bit-in-Chandrapur)

माहिती मिळताच उपवनसंरक्षक अरविंद मुंढे, सहायक वनसंरक्षक प्रीतम कुमार कोडापे, पशुवैद्यकीय अधिकाऱ्यांनी घटनास्थळी पोहोचून कार्यवाही केली. विशेष म्हणजे पाच दिवसांपासून वाघाचा मृत्यू होऊन सडण्याची प्रक्रिया सुरू झाली होती. असे असताना संबंधित वन कर्मचाऱ्यांना घटनेची माहिती कशी मिळाली नाही? या क्षेत्रात काही दिवसांपूर्वी अस्वलीच पिल्लू मृतावस्थेत आढळून आले होते.

सुमठाणा मार्गावर चितळाचा मृत्यू सुद्धा होत आहे. त्यामुळे वन्य जिवाच्या संरक्षणाकडे दुर्लक्ष करणाऱ्या वनकर्मचाऱ्यांवर कारवाई करण्याची मागणी नेफडो संस्थेचे बादल बेले यांनी केली आहे. गोपनीय पद्धतीने राजुरा वनपरिक्षेत्र अधिकारी आणि कर्मचाऱ्यांनी वरिष्ठांच्या मार्गदर्शनात पंचनामा करून वाघावर अंत्यसंस्कार केले.

४ ते ५ दिवसांपूर्वी मृत्यू

वाघाचा मृतदेह कुजलेल्या स्थितीत आढळून आला. वाघाचा ४ ते ५ दिवसांपूर्वी मृत्यू झाला असावा, असा कयास लावण्यात येत आहे. परंतु, मृत्यूचे नेमके कारण शवविच्छेदन अहवालानंतर स्पष्ट होईल, अशी प्रतिक्रिया वन परिक्षेत्र अधिकारी विदेशकुमार गलगट यांनी दिली.

(Rotten-carcass-of-a-tiger-found-in-Vihirgaon-bit-in-Chandrapur)