तिवसा (जि. अमरावती) : राज्य सरकारच्या परवानगीनंतर आता अमरावतीच्या गुरुकुंज मोझरीतील तुकडोजी महाराजांचे प्रार्थना मंदिर व समाधी आज सकाळी सामुदायिक ध्यानानंतर कोरोना काळातील सर्व नियम पाळून भाविकांसाठी खुली करण्यात आली आहे. विशेष म्हणजे समाधीचे दर्शन झाल्यानंतर पहिल्या पाच भाविकांचे औक्षण करून त्यांना तुकडोजी महाराजांची ग्रामगीता भेट देऊन यशोचित सन्मान करण्यात आला.

कोरोनाच्या पार्श्वभूमीवर मागील तब्बल आठ महिन्यांपासून राज्यभरातील सर्व छोटे मोठे धार्मिक स्थळे हे बंद होते. त्यामुळेच राज्यातील महत्वाचे धार्मिक स्थळ असलेली तुकडोजी महाराज यांची गुरुकुंज मोझरीतील महासमाधी ही बंद होती. आता मुख्यमंत्री उध्दव ठाकरे यांच्या परवानगीनंतर ही समाधी ही आज सकाळी सामुदायिक ध्यानानंतर भाविकांना दर्शनासाठी खुली करण्यात आली आहे.

अधिक वाचा - "भूषण शहिद झाला आता दुसऱ्या मुलालाही सैन्यात पाठवणार"; दुःखात बुडालेल्या देशभक्त मातेचे उद्गार

तुकडोजी महाराज यांची समाधी ही खुल्या मैदानात असल्याने लॉकडाऊनमध्ये ही रस्त्यावरूनही तुकडोजी महाराजांच्या समाधीचं दर्शन हे भाविकांना घेत होते. परंतु, आता त्यांना आत जाऊन दर्शन घेता येणार आहे.

दरम्यान, राष्ट्रसंत तुकडोजी महाराज यांच्या पुण्यतिथी महोत्सवाला दरवर्षी लाखो गुरुदेव भक्त उपस्थिती लावत असतात. परंतु, यावर्षी कोरोनाच्या या काळात मंदिरे बंद असल्यामुळे मोजक्याच भक्तांच्या उपस्थितीमध्ये तुकडोजी महाराजांचा पुण्यतिथी महोत्सव पार पडला होता.

क्लिक करा - अखेरचाच ठरला ‘भूषण’चा वाढदिवस; आज शासकीय इतमामात अंतिम संस्कार

संपूर्ण समाधी परिसर सॅनिटाईझ

मंगळवारी पहिल्या पाच भविकांना ग्रामगीता भेट देण्यात आली. तत्पूर्वी, काल संस्थानच्या वतीने संपूर्ण समाधी परिसर सॅनिटाईझ करण्यात आला होता. आजपासून दर्शनासाठी येणाऱ्या प्रत्येक भाविकांना कोरोनाच्या नियमांचे पालन करावे लागणार आहे.

संपादन - नीलेश डाखोरे