यवतमाळ : यवतमाळमधील खासदार भावना गवळी आणि आमदार संजय राठोड यांना शिवसेनेकडून धक्का देण्यात आला आहे. शिवसेनेकडून दारव्हा, दिग्रज आणि नेरमधील पदाधिकाऱ्यांच्या जागी नव्याने नियुक्त्या करण्यात आल्या आहेत. ज्या पदाधिकाऱ्यांच्या जागी नियुक्त्या करण्यात आल्या आहेत ते राठोड आणि भावना गवळी यांचे समर्थक होते.

(Bhawna Gavli And Sanjay Rathod)

शिवसेनेच्या मध्यवर्ती कार्यालयातून या नियुक्त्या करण्यात आल्या आहेत. खासदार भावना गवळी आणि आमदार संजय राठोड यांनी शिंदे गटाला पाठिंबा दिल्याने शिवसेनेकडून पावले उचलले गेले आहेत. यवतमाळचे ठाकरे गटाचे नेते विश्वास नांदेकर, पराग शिंदे, राजेंद्र गायकवाड हे मुंबईत होते. शिवसेनेने शिंदे गटातील गवळी आणि राठोड यांना पाठिंबा देणाऱ्या कार्यकर्त्यांची हकालपट्टी करत नव्याने नियुक्त्या केल्या आहेत.

दरम्यान, भावना गवळी यांनी बंडखोरांचे समर्थन करत उद्धव ठाकरे यांना पत्र लिहिले होते. त्यामध्ये त्यांनी एकनाथ शिंदे यांच्यासहित बंडखोरांचे समर्थन केले होते. त्यामुळे शिवसेनेने त्यांचे लोकसभेतील शिवसेनेचे मुख्यप्रतोदपद काढून घेतले होते. त्यानंतर त्या शिंदे गटाला पाठिंबा देण्याच्या मार्गावर आहेत आमदार संजय राठोड यांनी शिंदे गटाला पाठिंबा दिला आहे. त्याचबरोबर त्यानंतर शिवसेनेचे पक्षप्रमुख उद्धव ठाकरे यांनी संजय राठोड आणि भावना गवळी यांना पक्षात जागा नाही असं दोन दिवसांपूर्वी म्हटलं होतं. त्यानंतर राठोड आणि गवळी यांच्या मतदारसंघातील पदाधिकाऱ्यांच्या जागेवर नव्याने नियुक्त्या करण्यात आल्या आहेत.