अमरावती : अमरावतीमध्ये मागील काही दिवसांपासून कोरोना रुग्णांची संख्या झपाट्याने वाढत चालली असून त्याबाबत चिंता व्यक्त केली जात आहे. जिल्हा प्रशासन तसेच आरोग्य विभागसुद्धा रुग्णवाढीमुळे आश्चर्यचकीत असून कोरोनाचा हा नवीन 'स्ट्रेन' तर नाही ना? याची शहानिशा करण्यासाठी काही नमुने पुणे येथील एनआयव्ही प्रयोगशाळेकडे पाठविण्यात आल्याची माहिती आज (ता.11) जिल्हाधिकारी शैलेश नवाल यांनी दिली. 

हेही वाचा - Success Story : एकदाच केली दीड लाखांची गुंतवणूक आता...

जिल्हाधिकारी म्हणाले, की मागील काही दिवसांत रुग्णसंख्या तसेच पॉझिटिव्हचे प्रमाण अमरावती जिल्ह्यात अधिक दिसून येत आहे. नवी दिल्ली येथील आरोग्य चमूने सुद्धा भेट देऊन अमरावतीच्या स्थितीविषयी चिंता व्यक्त केली आहे. संसर्ग होण्याचे प्रमाण अधिक वाढले आहे. एकाच कुटुंबात पॉझिटिव्ह येणाऱ्यांचे प्रमाण वाढल्याचे त्यांनी सांगितले. पुढील एक महिना महत्त्वाचा ठरणार आहे. होम आयसोलेशनच्या नियमांचा भंग होत असून आता यापुढे नियम तोडणाऱ्यांवर कारवाईचे आदेश देण्यात आले आहेत. याशिवाय मास्कचा वापर न करणाऱ्यांवर दंडात्मक कारवाई वाढविण्यात आली असून, आणखी काही पथके स्थापन करण्यात येणार आहेत.

28 पर्यंत शाळा, महाविद्यालये बंद - 
कोरोनाची रुग्णसंख्या पाहता 28 फेब्रुवारीपर्यंत महाविद्यालये तसेच शाळा बंद ठेवण्याच्या सूचना प्रशासनाकडून देण्यात येत आहेत. त्यानंतर रुग्णस्थिती पाहून निर्णय घेतला जाईल, असे जिल्हाधिकारी शैलेश नवाल म्हणाले. 

हेही वाचा - किसान सन्मान योजनेचा निधी घेणे पडले महाग, आता सातबारावर चढणार बोजा

वलगावचे सेंटर पुन्हा सुरू - 
मध्यंतरी नियंत्रणात आलेल्या कोरोनाने आणखी उचल खाल्ली आहे. त्यामुळे कोविड हॉस्पिटलमध्ये सज्जतेच्या सूचना देण्यात आल्या असून ऑक्‍सिजन तसेच रेमिडेस्वीर औषधी उपलब्ध करून देण्यात येत आहे. याशिवाय बंद असलेले वलगाव येथील लक्षणे नसलेल्या रुग्णांना ठेवण्यासाठी तसेच विलगीकरणासाठी उपयोगात असलेले 160 बेडसचे सेंटर पुन्हा सुरू केले जाणार असल्याचे जिल्हाधिकारी शैलेश नवाल यांनी सांगितले. याशिवाय खासगी दोन रुग्णालयांनी कोविड सेंटर सुरू करण्याची परवानगी मागितल्याचे त्यांनी सांगितले.