वर्धा : दारू तस्करीसाठी अनेकांकडून विविध क्लृप्त्या लढविल्या जात आहेत. कोणत्याही प्रकारची कुणकुण लागू नये म्हणून दारूविक्रेते नवीन शक्कल ळडवीत आहेत. असाच प्रकार येथे पुन्हा उघड झाला. यात कांद्याच्या पोत्याआड दारूची तस्करी करताना दोघांना अटक करण्यात आली आहे. त्यांच्याजवळून दारूसह एकूण १२ लाख १९ हजार रुपयांचा मुद्देमाल जप्त करण्यात आला आहे.

दोघांना केली अटक

मंगेश मदन अहेरवाल (वय २३) रवीदासनगर, वॉर्ड नं. ४, मुर्तीजापूर (जि. अकोला), बाबूलाल सिद्धार्थ सदानशिव (वय ३०) रा. लंगापूर पोई, ता. मूर्तिजापूर, जि. अकोला, अशी अटक करण्यात आलेल्या व्यक्‍तींची नावे असल्याची माहिती पोलिसांनी दिली. हे दोघे कांद्याच्या पोत्याआड दारूसाठा भरून चंद्रपूर येथे जाणार होते, अशी कबुली या आरोपींनी दिल्याचे पोलिसांनी सांगितले.

जाणून घ्या : व्याघ्र भ्रमंतीचे मार्ग वाचविण्याची गरज - वनमंत्री राठोड

हिंगणघाट पोलिसांनी रचला सापळा

हिंगणघाट येथील गुन्हे अन्वेषण विभागाच्या पोलिसांना एका मालवाहू (क्र. एमएच १० सीए ६१४९) वाहनातून दारूसाठा चंद्रपूर येथे जात असल्याची माहिती मिळाली. या माहितीवरून पोलिसांनी सापळा रचून नंदोरीकडे जाणाऱ्या मार्गावर माहितीत असलेल्या वाहनाची झडती घेतली. त्या वाहनात कांद्यांच्या पोत्याआड मोठ्या प्रमाणात दारू तस्करी केली जात असल्याचे आढळून आले.

अवश्य वाचा : पणन महासंघाकडून केंद्र निश्चित, राज्यात ३० ठिकाणी होणार कापूस खरेदी

१२ लाख १९ हजार रुपयांचा मुद्देमाल जप्त

यात पोलिसांनी देशी दारूचे १२० खोके, ३०० किलो कांदे, बोलेरो गाडी, एक मोबाईल व वाहन असा १२ लाख १९ हजार रुपयांचा मुद्देमाल जप्त केला. ही कारवाई उपविभागीय पोलिस अधिकारी भीमराव टेळे, ठाणेदार सत्यवीर बंडीवार यांच्या मार्गदर्शनात गुन्हे अन्वेषण पथकाचे हवालदार शेखर डोंगरे, नीलेश तेलरांधे, सचिन घेवंदे, विशाल बंगाले, सचिन भारशंकर यांनी केली आहे.

(संपादन : दुलिराम रहांगडाले)