राजुरा (जि. चंद्रपूर): क्रीडाप्रेमींना तंत्रशुद्ध पद्धतीने खेळाचा सराव करता यावा, या उद्देशाने तालुकास्तरावर क्रीडासंकुले तयार करण्यात आली आहेत. मात्र, येथील क्रीडासंकुलात झुडपे वाढली आहेत. मोकाट जनावरांचा नेहमीच वावर असतो. त्यामुळे युवकांना नाइलाजास्तव जीव धोक्‍यात घालून महामार्गाने सरावासाठी जावे लागत आहे.

शहरातील व तालुक्‍यातील क्रीडाप्रेमींना तंत्रशुद्ध पद्धतीने खेळाचा सराव करता यावा, लहान-मोठ्या क्रीडा स्पर्धांचे आयोजन करणे सोयीचे व्हावे या उद्देशातून तालुका क्रीडासंकुल निर्माण करण्यात आले आहे. सुमारे 15 एकर परिसरात हे संकुल आहे. इनडोअर खेळ खेळण्यासाठी मोठा हॉलसुद्धा आहे. मैदानी कसरतीसाठी व्यायाम साहित्य आहे. परंतु, या संकुलाची देखरेख व दुरुस्तीकडे पूर्ण दुर्लक्ष झाले आहे. संकुलाचा वीजपुरवठा मागील काही दिवसांपासून बंद आहे.

हेही वाचा - भरचौकात हत्या झालेल्या गुंडाच्या अंत्यसंस्काराला उसळली हजारोंची गर्दी; नागपुरात गॅंगवॉर भडकण्याची...

परिसरात सर्वत्र झुडपे वाढली असल्याने मोकाट जनावरांचा वावर वाढला आहे. स्वच्छतागृहाची पूर्णपणे दूरवस्था झाली आहे. त्यामुळे कोट्यवधी रुपये खर्चून तयार करण्यात आलेले क्रीडासंकुल शोभेची वास्तू ठरली आहे. क्रीडासंकुलाच्या दूरवस्थेमुळे शहरातील युवकांना जीव धोक्‍यात घालून महामार्गावर धावणे, इतर कसरतीचा सराव करावा लागत आहे. युवकांना दर्जेदार क्रीडा प्रकार व त्याचे तंत्र शुद्ध सराव करता यावा यासाठी क्रीडासंकुलाच्या देखभालीची जबाबदारी एखाद्या क्रीडा अकादमीकडे सोपविण्यात यावी, अशी मागणी छत्रपती क्रीडा अकादमीच्या पदाधिकारी, युवकांनी केली आहे.