निलज बु. (जि. भंडारा) : मृग नक्षत्राच्या पावसाची चाहूल लागताच जिल्हाभरातील शेतकरी खरिपाच्या (kharif crops) पेरणीच्या लगबगीत लागतो. पेरणीची पूर्वतयारी म्हणून शेतकरी शेतीची मशागत करण्यासाठी वखरणी, नांगरणी करून ठेवतात. नंतर प्रश्न पडतो धानाची बियाणे मिळविण्याचा. यासाठी तो गावातील सोबतच्या शेतकऱ्यांना धानाच्या वेगवेगळा वाणांबद्दल विचारपूस करू लागतो. प्रत्येक जण आपापल्या अनुभवावरून धानाच्या (Paddy) वेगवेगळ्या वाणांची माहिती सांगत असतो. मग शेतकरी बाजारातील बियाणांच्या दुकानाकडे धाव घेतो व योग्य बियाणे (Seeds) निवडून धानाची लागवड करतो. (Strange-name-given-to-grain-varieties-by-the-company)

यावर्षी मात्र बाजारातील धानाच्या बियाणांची अफलातून व विचित्र नावे शेतकऱ्यांचे लक्ष वेधून घेत आहेत. अलीकडेच दक्षिण भारतात प्रदर्शित होऊन देशभरात सुप्रसिद्ध झालेल्या बाहुबली या सिनेमावरून धानाच्या बारीक स्वरूपाच्या बियानाला एका खासगी कंपनीने ‘बाहुबली’ हे नाव दिले आहे. सोबतच बाहुबली सिनेमातून प्रसिद्ध झालेला बाहुबलीचा मामा ‘कटप्पा’ याचेही नाव एका ठोकळ धानाच्या बियाणाच्या वाणाला देण्यात आले आहे. हद्द तर तेव्हा होते की, एका कंपनीने तर बाहुबलीची आई ‘शिवगामीदेवी’ इचेही नाव बियाणांना दिले आहे.

बाजारात आलेल्या धानाच्या बियानांपैकी बाहुबली, कटप्पा, शिवगामीदेवी सोबतच श्वेता, पौर्णिमा, मनीषा, पुष्पा, सुमन, मनाली, प्रणाली, यशोदा, परंपरा, अहिल्या, महालक्ष्मी, गीतांजली, लक्ष्मी अशी स्त्रियांची नावेही देण्यात आली आहेत. धान्याची नावे जरी आकर्षक असली तरी मागच्या वर्षीच्या तुलनेत यावर्षी बियाणांचा किमतीमध्ये ३० रुपयांपासून ते ६० रुपयांपर्यंत व काही वाणांमध्ये ही वाढ जास्तही झालेली पाहावयास मिळते आहे. इंधनाचे वाढलेले दर व त्यामुळे वाढलेला वाहतूक खर्च यामुळे बियाणांच्या दरात किंचित वाढ झाल्याचे कृषी केंद्र चालक सांगतात. बियाणांची अशी प्रसिद्ध व अफलातून नावे शेतकऱ्यांना मात्र आकर्षित करीत असल्याचे दृश्य बाजारपेठांमध्ये पाहावयास मिळत आहेत.

(Strange-name-given-to-grain-varieties-by-the-company)