अमरावती : विधान परिषद निवडणुकीनंतर महाविकास आघाडीचे सरकार कोसळेल असा दावा भाजपने (BJP) काल केला होता. मात्र, भाजपच्या दाव्यावर राष्ट्रवादी काँग्रेसच्या नेत्या व खासदार सुप्रिया सुळे यांनी पलटवार केला. अडीच वर्षे त्यांनी खूप तारखा दिल्या आणखी एक तारीख पाहू, असा टोला सुप्रिया सुळे (Supriya Sule) यांनी भाजपला लगावला. (Supriya Sule attack on BJP in amravati)

अमरावतीमध्ये (amravati) आल्या असत्या त्या पत्रकारांशी बोलत होत्या. महाराष्ट्रात महाविकास आघाडीचे सरकार आल्यापासून सरकार पडणार असल्याचा दावा भाजपकडून केला जात आहे. या गोष्टीला आज अडीच वर्षे झाली. मात्र, सत्ता काही पडलेली नाही. तरीही विरोधकांची सरकार बाबतची भविष्यवाणी काही केल्या संपलेली नाही. यावरून सुप्रिया सुळे यांनी भाजपला टोला हाणला.

देशात दडपशाहीचे सरकार सुरू आहे. जो पण या सरकारच्या विरोधात बोलतो त्याच्यावर कारवाई केली जाते. त्याच्या मागे ईडी लावून त्रास दिला जातो. हे आपण अनेक वर्षांपासून पाहत आहोत, असे सुप्रिया सुळे (Supriya Sule) काँग्रेस नेते राहुल गांधी यांना ईडीने चौकशीसाठी बोलावले यावर उत्तर देताना म्हणाल्या.

पंतप्रधान नरेंद्र मोदी (Narendra Modi) यांनी देशातील बेरोजगारांना नोकरी देण्याचे आश्वासन दिले आहे. याचे मी स्वागत करते. देशातील बेरोजगार लोकांना नोकरी मिळत असेल तर त्यांचे मी स्वागत करते, असेही सुप्रिया सुळे म्हणाल्या.