यवतमाळ : उमरखेडचे नायब तहसीलदार वैभव पवार व तलाठी गजानन सुरोशे यांच्यावर शनिवारी (ता.23) वाळूमाफियांनी चाकूने प्राणघातक हल्ला केला होता. या प्रकरणातील मुख्य आरोपीला अजूनही अटक करण्यात आलेली नाही. त्यामुळे मंगळवारी (ता.दोन) तहसीलदार, नायब तहसीलदार संघटनेने राज्यव्यापी सामूहिक रजा आंदोलन पुकारले आहे. 

हेही वाचा - वाराणसीमधून निवडणूक लढवून जिंकून दाखवू, 'या' खासदाराचे थेट मोदींना आव्हान

यवतमाळ जिल्ह्यातील उमरखेड तालुक्‍यात वाळूमाफियांनी नायब तहसीलदार, तलाठ्यावर हल्ला केला होता. दोषींवर कारवाईच्या मागणीसाठी तहसीलदार, नायब तहसीलदार संघटनेने कामबंद आंदोलन केले होते. घटनेला दहा दिवसांचा कालावधी लोटूनही मुख्य आरोपी अद्याप पोलिसांच्या ताब्यात आलेला नाही. मुख्य आरोपीला अटक करण्यात यावी तसेच वाळू धोरणावर पुनर्विचार करण्यात यावा, या मागण्यांसाठी तहसीलदार, नायब तहसीलदार संघटनेने राज्यव्यापी आंदोलन छेडले आहे. उद्या मंगळवारी (ता.2) राज्यातील सर्व तहसीलदार, नायब तहसीलदार तसेच तलाठी सामूहिक रजा आंदोलन करणार आहेत. संघटनेने यापूर्वी सुरक्षारक्षकांची मागणी केली होती. मात्र, अजूनही सुरक्षारक्षक पुरविण्यात आले नाहीत. यवतमाळ जिल्ह्यात तहसीलदार संघटनेचे अध्यक्ष कुणाल झाल्टे यांच्या नेतृत्वात आंदोलन होणार आहे. 

हेही वाचा - भाजपकडून महापालिका निवडणुकीची जोरदार तयारी, अर्थसंकल्पात नागपूर मेट्रोसाठी ५ हजार ९७६ कोटी

सरपंचपदाचे आरक्षण काढणार -
राज्यातील तहसीलदार तसेच नायब तहसीलदार सामूहिक रजा आंदोलन करणार आहेत. मंगळवारीच सरपंचपदाच्या आरक्षणाची सोडत आहे. सामूहिक रजा आंदोलन असले तरी निवडणुकीचे काम असल्याने त्यावेळेत संबंधित अधिकारी, कर्मचारी उपस्थित राहणार आहेत. त्यामुळे आरक्षण सोडतीवर कुठलाही परिणाम होणार नाही.