वर्धा : नवी दिल्ली ते हैदराबाद धावणाऱ्या तेलंगणा एक्‍स्प्रेसच्या चाकाला आग लागल्याचा प्रकार वर्धा जिल्ह्यातील सेलूदरम्यान रविवारी दुपारी उघडकीस आला. येथे दुरुस्ती करून या एक्‍स्प्रेसला सेवाग्राम स्थानकावर थांबा देत तिची पूर्ण दुरुस्ती करून पुढे पाठविण्यात आली.

वाळूच्या टिप्परचे नियंत्रण सुटले अन् घडली ही घटना...

नागपूर सोडून तेलंगना एक्‍स्प्रेस सेवाग्रामकडे निघाली असता सेलूलगत गाडीच्या एस आठ क्रमांकाच्या बोगीच्या चाकातून आग निघत आल्याचे दिसून आले. यामुळे सेलूलगत चौकशी करून तात्पुरती दुरुस्ती करण्यात आली. येथून ही एक्‍स्प्रेस सेवाग्रामकडे रवाना झाली. येथे काही मिनिटांचा थांबा देत चाकात आलेला बिघाड दुरुस्त करून ही गाडी पुढच्या प्रवासासाठी रवाना करण्यात आली. पुढील प्रवासात पुन्हा बिघाड येऊ नये यासाठी तांत्रिक विभागाचे दोन कर्मचारी या एक्‍सप्रेसमध्ये पाठविण्यात आल्याची माहिती रेल्वे प्रशासनाने दिली आहे.