धारणी (जि. अमरावती) : येथून तीन किलोमीटर अंतरावरील वसंतराव नाईक महाविद्यालयाजवळ सोमवारी (ता.20) सायंकाळी धारणी पोलिसांनी दोन युवकांकडून चार देशी कट्टे व दोन जीवंत काडतुस जप्त केले आहे. यावरून मध्यप्रदेशातून धारणीत देशी कट्ट्यांची तस्करी होत असल्याचे सिद्ध झाले आहे. 

चार देशी कट्टे विकण्याचा केला सौदा

प्राप्त माहितीनुसार, धारणी शहरात दोन वर्षांपासून बऱ्हाणपूर जिल्ह्यातील पाचोरी (ता. खकनार) येथील लखबीर अकालसिंह खिंची उर्फ लकी (वय 19) व संजयसिंग जसपाल पटवा (वय 21) चाबी बनविण्याचे काम करण्यासाठी धारणीत येत होते. चाबी बनविण्याच्या आडून ते देशी कट्ट्यांची तस्करी करीत होते. सोमवारी या दोघांनी तालुक्‍यातील एका व्यक्तीसोबत चार देशी कट्टे विकण्याचा सौदा केला होता. 

अवश्‍य वाचा : हवेत गोळीबार केल्याने गेला तुरुंगात, परत आल्यावर केले असे 

पोलिसांनी रचला सापळा

त्याप्रमाणे ते दोघेही बऱ्हाणपूर- खंडवा- इंदौर या राज्य महामार्गावर असलेल्या वसंतराव नाईक महाविद्यालयाजवळ चार देशी कट्टे व दोन जीवंत काडतूस घेऊन उभे होते. याची माहिती सोमवारी सायंकाळी धारणी पोलिसांना मिळाली. त्याआधारे सायंकाळी सहा वाजताच्या सुमारास सहायक पोलिस निरीक्षक तांबे, कान्होपात्रा बनसा, पीएसआय भारत लसंते, अरविंद सरोदे, रवींद्र वऱ्हाडे, प्रभाकर डोंगरे, गणेश डहाके यांनी सापळा रचून त्या दोघांना अटक केली. त्यांची झडती घेतली असता त्यांच्याकडून चार देशी कट्टे व दोन जीवंत काडतूस जप्त गुन्हा दाखल केला आहे.