नागपूर : विदर्भासाठी मंगळवारचा दिवस चांगली वार्ता घेऊन आला नाही. तीन जिल्ह्यामंध्ये तब्बल 37 रुग्णांचे अहवाल पॉझिटिव्ह आढळून आले. यात सर्वाधिक रुग्ण यवतमाळ जिल्ह्यातील आहेत. यवतमाळमध्ये 17, नागपुरात 12 व अमरावतीत आठ असे एकूण 37 रुग्णांचा अहवाला पॉझिटिव्ह आला आहे. यामुळे प्रशासनाची चिंता चांगलीच वाढली आहे. 

रोज नवीन वस्तीत कोरोनाचा शिरकाव होत असल्याने येणाऱ्या दिवसात कोरोना अधिक घातक ठरण्याची दाट शक्‍यता आहे. दर दिवसाला दोन आकड्यांमध्ये कोरोनाचे रुग्ण वाढत असल्याने प्रशासन चिंतेत आहे. अवघ्या चार दिवसांत शंभर कोरोनाचे रुग्ण वाढले आहेत. सोमवारी महापालिकेच्या कर्मचाऱ्यांसह 19 जणांना कोरोनाची बाधा झाल्याचे स्पष्ट झाले होते. मंगळवारी आढळलेल्या 11 रुग्णांमुळे एकूण रुग्णांची संख्या 571 झाली आहे. यातील सहा व्हीएनआयटी तर पाच जण पाचपावली विलगीकरण केंद्रातील आहेत.

क्लिक करा - नागपुरात बहरले सोनू सूदचे प्रेम; शंकरनगरातील ब्रेड पकोडा व कटिंग चहाचा होता दिवाना

मागील अडीच महिन्यात बजाजनगर, अभ्यंकरनगर, खामला, जयनगर, जरीपटका, मोमिनपुरा, सतरंजीपुरा, टिमकी, हंसापुरी, बैरागीपुरा, गोळीबार चौक, शांतीनगर, कुंदनलाल गुप्तनगर, दलालपुरा, इतवारी, राजीव गांधीनगर, संगमनगर, यशोधरानगर, गौतमनगर, गिट्टीखदान, कुशीनगर, खरबी, खलाशीनगर, हावरापेठ, संतोषनगर, नाईक तलाव, बांगलादेश, वसंतनगर, काशीनगर, शताब्दीनगर, खरबी, इंदोरा अशा पन्नास वस्त्यांमध्ये कोरोनाचा शिरकाव झाला आहे. 

ही जोखीम उपराजधानीच्या माथ्यावर आहे. तसेच आमदार निवास विलगीकरण केंद्रातील एका डॉक्‍टरसह आरोग्य कर्मचारी बाधित आढळून आला. यामुळे रविवारी येथील पाच जणांची चाचणी करण्यात आली होती. त्यांचे नमुने नकारात्मक आले. मात्र, घाबरलेल्या इतर डॉक्‍टरांसह आरोग्य कर्मचारी अशा 12 जणांचे नमुने सोमवारी सकाळी तपासणीसाठी घेण्यात आले. 

मध्य नागपूरच हॉटस्पॉट

नागपूर शहरात 11 मार्च ते आतापर्यंत 11 जणांचा मृत्यू झाला आहे. मृत्यूचा आकडा नियंत्रणात असला तरी बाधितांचा आकडा मात्र फुगत आहेत. शहरातील अनेक वस्त्या कोरोनाचे "हॉटस्पॉट' ठरत आहेत. मोमिनपुरा, सतरंजीपुरा, गोळीबार चौक, नाईक तलाव हॉटस्पॉट ठरले आहेत. यापुढची वस्ती कोणती असेल हे सांगता येत नसले तरी मध्य नागपुरातील या सगळ्या वस्त्या आहेत.

अधिक माहितीसाठी - 'लिव्ह इन'मध्ये राहायचे प्रेमीयुगुल; संबंधात अडथळा आल्याने युवक चवताळला अन्‌...

यवतमाळमध्ये एकाच कुटुंबातील 13 रुग्ण

संस्थात्मक विलगीकरण कक्षात भरती असलेल्या 17 जणांचे रिपोर्ट मंगळवारी पॉझिटिव्ह आले आहेत. त्यापैकी 13 व्यक्ती एकाच कुटुंबातील सदस्य आहेत. त्यामुळे जिल्ह्यात ऍक्‍टिव्ह पॉझिटिव्ह रुग्णांची संख्या एकूण 36 झाली आहे. पॉझिटिव्ह असलेल्या एका रुग्णाचा सोमवारी रात्री मृत्यू झाला. यामुळे जिल्ह्यात कोरोनाबधित मृतांची संख्या तीन झाली आहे. सुरुवातीपासून आतापर्यंत एकूण पॉझिटिव्ह रुग्णांचा आकडा 145 वर गेला आहे. त्यापैकी 106 रुग्ण उपचारानंतर बरे होऊन घरी गेल्याचे प्रशासनाने कळविले आहे. 

अमरावतीत आठ संशयित रुग्णांचा अहवाल पॉझिटिव्ह

आठ संशयित रुग्णांचा अहवाल पॉझिटिव्ह आला. आठ जणांमध्ये चार महिला व चार पुरुषांचा समावेश आहे. हे रुग्ण फ्रेझरपुरा, रतनगंज, मालू ले-आउट (सातुर्ना), मसानगंज, जलारामनगर या भागातील रहिवासी आहेत. मालू ले-आउट, जलारामनगर हे दोन्ही नवीन परिसर आहेत. उर्वरित ठिकाणी यापूर्वी कोरोना संक्रमित आढळले आहेत. आतापर्यंत एकूण पॉझिटिव्ह रुग्ण 238 झाले आहेत. बरे होऊन 124 जण घरी गेले आहेत.