सिंदेवाही(चंद्रपूर) : घरात गाढ झोपेत असलेल्या महिलेवर वाघाने हल्ला करून जखमी केले. ही घटना शनिवारी (ता. १७) रात्री बारा वाजताच्या सुमारास सिंदेवाही वनपरिक्षेत्राअंतर्गत येत असलेल्या खैरी या गावात घडली. जखमी महिलेचे नाव सुनंदा मेश्राम (वय ६०) असे आहे. तिच्यावर ग्रामीण रुग्णालयात उपचार सुरू आहे.

मागील आठवड्यात वाघाने एकाच कुटुंबातील दोघांवर हल्ला करून ठार केले होते. सिंदेवाही वनपरिक्षेत्रात खैरी हे गाव येते. या गावातील सुनंदा मेश्राम जेवण आटोपल्यानंतर झोपल्या होत्या. रात्रीच्या सुमारास गावात वाघाने प्रवेश केला. मेश्राम यांच्या गोठ्यातील शेळीवर वाघाने हल्ला केला.

त्यानंतर घरातील दरवाजावर थाप दिली. कुणी तरी आले असेल म्हणून सुनंदा मेश्राम यांनी दार उघडले. दार उघडून बघितल्यावर समोर वाघ होता. काही कळायच्या आत वाघाने तिच्यावर हल्ला करून गंभीर जखमी केले. त्यांनी आरडाओरड सुरू केली. गावकरी धावतपळत आले. त्यानंतर वाघाने तेथून धूम ठोकली. हृदयद्रावक! गेला नवरीला आणायला पण घरी आला मृतदेह! लग्नसोहळा आटोपताच नवरदेवाचा मृत्यू

जखमी अवस्थेत सुनंदा मेश्राम यांना ग्रामीण रुग्णालयात आणण्यात आले. गेल्या काही दिवसांपासून वाघाने या भागात धुमाकूळ घातला आहे. त्यामुळे नागरिकांत भीतीचे वातावरण आहे. वनविभागाने वाघाचा बंदोबस्त करावा, अशी मागणी जंगलाशेजारी गावातील नागरिकांनी केली आहे.

संपादन - अथर्व महांकाळ